കണ്ണൂർ : മുസ്ലിംലീഗ് നേതാവ് കെ.എം ഷാജി എം.എല്.എയെ വിജിലന്സ് ചോദ്യം ചെയ്യുന്നു. അഴീക്കോട് സ്കൂളിന് പ്ലസ്ടു അനുവദിക്കുന്നതുമായി ബന്ധപ്പെട്ട കോഴ കേസിലാണ് ചോദ്യം ചെയ്യല്.
കണ്ണൂർ വിജിലൻസ് ഡിവൈഎസ്പി ബാബു പെരിങ്ങേത്തിന്റെ നേതൃത്വത്തിലാണ് ചോദ്യം ചെയ്യൽ നടക്കുന്നത്.ഇന്ന് മൂന്ന് മണിയോടു കൂടിയാണ് വിജിലന്സ് ഓഫീസില് കെ. എം ഷാജി ചോദ്യം ചെയ്യലിനായി എത്തിയത്.
കഴിഞ്ഞ യു.ഡി.എഫ് സര്ക്കാരിന്റെ കാലത്ത് അഴീക്കോട് ഹൈസ്കൂളില് പ്ലസ്ടു അനുവദിക്കുന്നതിന് 25 ലക്ഷം രൂപ കോഴ വാങ്ങിയെന്ന പരാതിയാണ് കേസിന് അടിസ്ഥാനം. ലീഗ് പ്രാദേശിക നേതാവ് നൗഷാദ് പൂതപ്പാറ ലീഗ് നേതൃത്വത്തിന് നല്കിയ കത്തിന്റെ കോപ്പിസഹിതം സി.പി.എം. കണ്ണൂര് ഏരിയാ കമ്മിറ്റി അംഗം കുടുവന് പത്മനാഭന് 2017-ല് മുഖ്യമന്ത്രിക്ക് പരാതി നല്കിയിരുന്നു. ഈ ആരോപണത്തില് കഴമ്പുണ്ടെന്നാണ് വിജിലന്സിന്റെ റിപ്പോര്ട്ട്.
അനധികൃത സ്വത്ത് സമ്പാദിച്ചെന്ന പരാതിയില് വിജിലൻസിൻ്റെ കോഴിക്കോട് യൂണിറ്റും കെ.എം. ഷാജിക്കെതിരെ അന്വേഷണം നടത്തുന്നുണ്ട്.
