തിരുവനന്തപുരം:എംഎസ്സി എൽഎസ് 3 ചരക്ക് കപ്പൽ മുങ്ങിയതിന് ശേഷം കടലിൽ ഒഴുകിയ കണ്ടെയ്നറുകളിൽ ചിലത് തിരുവനന്തപുരം തീരത്ത് കണ്ടെത്തി. വർക്കല, അയിരൂർ, പാപനാശം ബീച്ച്, ഇടവ മന്ത്ര, അഞ്ചുതെങ്കിൽ, മുതലപ്പൊഴി താഴംപള്ളി എന്നീ പ്രദേശങ്ങളിൽ ഈ കണ്ടെയ്നറുകൾ കണ്ടെത്തിയിട്ടുണ്ട്. കണ്ടെയ്നറുകളുടെ അവശിഷ്ടങ്ങൾ തിരമാലകളോടൊപ്പം തീരത്തെത്തിയതായി നാട്ടുകാർ റിപ്പോർട്ട് ചെയ്യുന്നു. ചില കണ്ടെയ്നറുകൾ തകർന്ന നിലയിലാണ് കണ്ടെത്തിയത്.
പോലീസും നാട്ടുകാരും ചേർന്ന് ഒരു കണ്ടെയ്നർ കയറു കെട്ടി കരയിലേക്ക് വലിച്ചെടുത്തു. ഇടവ മാന്ത്രയിൽ തുറന്ന നിലയിലുള്ള രണ്ട് കണ്ടെയ്നറുകൾ കണ്ടെത്തിയിട്ടുണ്ട്. കണ്ടെയ്നറുകളിൽ നിന്ന് പാഴ്സലുകളും ചാക്കുകളും തീരത്ത് അടിഞ്ഞുകൂടിയിരിക്കുന്നു.
കഴിഞ്ഞ ദിവസം കൊല്ലം, ആലപ്പുഴ ജില്ലകളിലെ തീരങ്ങളിലും കണ്ടെയ്നറുകൾ കണ്ടെത്തിയിരുന്നു. അറബിക്കടലിൽ മുങ്ങിയ കപ്പലിൽ നിന്നുള്ള ഈ വസ്തുക്കളിൽ ചിലത് അപകടകരമായ രാസവസ്തുക്കൾ അടങ്ങിയിരിക്കാനിടയുണ്ട്. ഇതിൽ കാൽസ്യം കാർബൈഡ് പോലെയുള്ള പദാർത്ഥങ്ങൾ അടങ്ങിയിരിക്കുന്നു. ഇവ വെള്ളവുമായി സമ്പർക്കം പുലർത്തിയാൽ തീപിടിക്കാനോ പൊള്ളലുണ്ടാക്കാനോ സാധ്യതയുണ്ട്. കപ്പലിൽ നിന്ന് ഇന്ധനം ചോർന്നതായും അറിയുന്നു.
അധികൃതർ നൽകുന്ന മുന്നറിയിപ്പ് പ്രകാരം, സംശയാസ്പദമായ വസ്തുക്കൾ കണ്ടാൽ അവ തൊടാതെ ഉടൻ 112-ലോ പ്രാദേശിക അധികൃതരോടോ ബന്ധപ്പെടണം. കണ്ടെയ്നറുകൾ നീക്കംചെയ്യുമ്പോൾ 200 മീറ്ററോളം അകലെ നിൽക്കുകയും തടസ്സം സൃഷ്ടിക്കാതിരിക്കുകയും വേണം.
