കോഴിക്കോട്: കോഴിക്കോട് മെഡിക്കൽ കോളേജിലെ തീപിടിത്തത്തിൽ മരിച്ച അഞ്ച് പേരുടെ മരണകാരണം കുറിച്ച് അവ്യക്തത തുടരുന്നു. ഇവരിൽ രണ്ട് പേരുടെ പോസ്റ്റ്മോർട്ടം പരിശോധന ഇന്ന് നടത്തും. മൂന്ന് പേരുടെ മരണം ശ്വാസം മുട്ടിയതാണെന്ന ടി. സിദ്ധിഖ് എംഎൽഎയുടെ ആരോപണം നിരാകരിച്ച് മെഡിക്കൽ കോളേജ് പ്രിൻസിപ്പൽ ഇന്നലെ വിശദീകരണം നൽകി. വെസ്റ്റ് ഹിൽ സ്വദേശി ഗോപാലൻ, വടകരയിൽ നിന്നുള്ള സുരേന്ദ്രൻ, മേപ്പയൂർ സ്വദേശി ഗംഗാധരൻ, മേപ്പാടി നിവാസി നസീറ എന്നിവരും മറ്റൊരാളുമാണ് മരിച്ചത്. നസീറയുൾപ്പെടെ രണ്ട് പേരുടെ പോസ്റ്റ്മോർട്ടം ഇന്ന് നടത്തും.
ന്യൂ ബ്ലോക്കിലെ അത്യാഹിത വിഭാഗത്തിൽ ഇലക്ട്രിക്കൽ ഇൻസ്പെക്ടറേറ്റിന്റെയും ഫയർ ഫോഴ്സിന്റെയും പരിശോധന ഇന്ന് നടക്കും. അത്യാഹിത വിഭാഗം ഓൾഡ് ബ്ലോക്കിലേക്ക് താൽക്കാലികമായി മാറ്റുന്നതിനുള്ള തയ്യാറെടുപ്പുകൾ ആരംഭിച്ചിട്ടുണ്ട്. ഇന്നലെ രാത്രി എട്ട് മണിയോടെ മെഡിക്കൽ കോളേജിലെ യുപിഎസ് റൂമിൽ ഷോർട്ട് സർക്യൂട്ടിനെ തുടർന്ന് പുക പടർന്നതോടെ അത്യാഹിത വിഭാഗം ഒഴിപ്പിക്കുകയായിരുന്നു.
യുപിഎസ് റൂമിൽ പൊട്ടിത്തെറിയുണ്ടായതിനെ തുടർന്നാണ് തീ പടർന്നതെന്ന് വിവരം. ഷോർട്ട് സർക്യൂട്ടാണോ അപകടത്തിന് കാരണമെന്ന് പരിശോധിച്ചിട്ടേ തീരുമാനിക്കാൻ കഴിയൂ എന്ന് ഫയർ ഫോഴ്സ് അധികൃതർ വ്യക്തമാക്കി. ഈ പരിശോധനകൾ ഇന്ന് നടത്തും. അത്യാഹിത വിഭാഗം പൂർണ്ണമായും പോലീസ് സീൽ ചെയ്തിട്ടുണ്ട്. കോഴിക്കോട് ബീച്ച് ഹോസ്പിറ്റലിൽ അത്യാഹിത സേവനം ലഭ്യമാക്കുമെന്ന് ആരോഗ്യമന്ത്രി വീണാ ജോർജ് പ്രഖ്യാപിച്ചു. മെഡിക്കൽ കോളേജിലെ ഡോക്ടർമാരുടെ സേവനവും ഇവിടെ ലഭിക്കും.
ഇന്നലെ രാത്രി എട്ട് മണിയോടെ മെഡിക്കൽ കോളേജ് അത്യാഹിത വിഭാഗത്തിനടുത്തുള്ള യുപിഎസ് റൂമിൽ നിന്ന് പുക പൊങ്ങിയതായി റിപ്പോർട്ട് ചെയ്തു. യുപിഎസ് റൂമിൽ ഷോർട്ട് സർക്യൂട്ടാണ് സംഭവത്തിന് കാരണമെന്നാണ് പ്രാഥമിക തെളിവുകൾ സൂചിപ്പിക്കുന്നതെന്ന് ജില്ലാ കളക്ടർ വ്യക്തമാക്കി. ഇന്നലെ മാത്രം 200-ലധികം രോഗികളെ മെഡിക്കൽ കോളേജിൽ നിന്ന് മറ്റ് സർക്കാർ/സ്വകാര്യ ആശുപത്രികളിലേക്ക് മാറ്റി. അത്യാഹിത വിഭാഗം പൂർണ്ണമായും ഒഴിപ്പിച്ചിട്ടുണ്ട്.
കോഴിക്കോട് മെഡിക്കൽ കോളേജ് ആശുപത്രിയിലെ സാഹചര്യങ്ങൾ നിയന്ത്രണത്തിലാണെന്ന് സൂപ്രണ്ട് ശ്രീജയൻ ഉറപ്പ് നൽകി. അത്യാഹിത വിഭാഗത്തിലെ രോഗികളെ മെഡിക്കൽ കോളേജിലെ പ്രധാന കെട്ടിടത്തിലേക്ക് മാറ്റിയിട്ടുണ്ടെന്നും എല്ലാ സൗകര്യങ്ങളും ഒരുക്കിയിട്ടുണ്ടെന്നും അദ്ദേഹം വ്യക്തമാക്കി. ആശങ്കപ്പെടേണ്ടതില്ലെന്നും സൂപ്രണ്ട് ഊന്നിപ്പറഞ്ഞു
