മലപ്പുറം:നിലമ്പൂർ ഉപതിരഞ്ഞെടുപ്പിൽ തൃണമൂൽ കോൺഗ്രസ് സ്ഥാനാർത്ഥിയായി മത്സരിക്കാൻ പി.വി. അൻവർ സമർപ്പിച്ച നാമനിർദേശ പത്രിക തള്ളപ്പെട്ടു. സൂക്ഷ്മ പരിശോധനയ്ക്ക് ശേഷമാണ് ഈ തീരുമാനം എടുത്തത്. അൻവർ രണ്ട് സെറ്റ് നാമനിർദേശ പത്രികകൾ സമർപ്പിച്ചിരുന്നു, എന്നാൽ തൃണമൂൽ സ്ഥാനാർത്ഥിയായുള്ള പത്രിക മാത്രമേ നിരസിക്കപ്പെട്ടുള്ളൂ. ഇതോടെ, സ്വതന്ത്ര സ്ഥാനാർത്ഥിയായി അദ്ദേഹത്തിന് മത്സരിക്കാനുള്ള അവസരം നിലനിൽക്കുന്നു.
സാങ്കേതിക പ്രശ്നത്തെ തുടർന്നാണ് പത്രിക തള്ളിയതെന്നാണ് വിവരം. തൃണമൂൽ സ്ഥാനാർത്ഥിയായി അൻവർ സമർപ്പിച്ച പത്രികയിൽ പ്രശ്നങ്ങളുണ്ടെന്ന് വരണാധികാരി അറിയിച്ചു. തൃണമൂൽ കോൺഗ്രസ് ഒരു ദേശീയ പാർട്ടി അല്ലാത്തതിനാൽ, നാമനിർദേശ പത്രികയിൽ 10 പ്രമാണികളുടെ ഒപ്പുകൾ ഉൾപ്പെടുത്തേണ്ടത് ആവശ്യമാണ്. എന്നാൽ, അൻവറിന്റെ പത്രികയിൽ ഈ നിബന്ധന പാലിച്ചിട്ടില്ലെന്ന് വരണാധികാരി കണ്ടെത്തി. ഇതുമൂലമാണ് പത്രിക നിരാകരിച്ചത്.
ഒരേ സമയം പാർട്ടി സ്ഥാനാർത്ഥിയായും സ്വതന്ത്ര സ്ഥാനാർത്ഥിയായും മത്സരിക്കാൻ അൻവർ പത്രികകൾ സമര്‍പ്പിച്ചതില്‍ ദുരൂഹതയുണ്ടെന്ന ആരോപണവും ഉയർന്നിട്ടുണ്ട്.
