പെരിന്തൽമണ്ണ: ജില്ലയിൽ വീണ്ടും നിപ്പ വൈറസ് സ്ഥിരീകരിച്ചതിനെത്തുടർന്ന് കേന്ദ്ര സംഘം അന്വേഷണത്തിനായി ജില്ലയിലെത്തി. ഇന്നലെ സംഘം പെരിന്തൽമണ്ണ ആശുപത്രി സന്ദർശിച്ച് ചികിത്സയിലുള്ള രോഗിയെക്കുറിച്ചും സാഹചര്യങ്ങളെക്കുറിച്ചും ഡോക്ടർമാരോടും രോഗിയുടെ കുടുംബാംഗങ്ങളോടും വിവരങ്ങൾ ശേഖരിച്ചു. രോഗിയുടെ വളാഞ്ചേരിയിലെ വീട്ടുപരിസരത്തുള്ള പഴങ്ങളിൽ നിന്ന് സാമ്പിളുകൾ ശേഖരിച്ച് പരിശോധനയ്ക്ക് അയയ്ക്കും. വവ്വാൽ കടിച്ച പഴങ്ങൾ വഴി വൈറസ് പടർന്നിട്ടുണ്ടോ എന്ന സംശയത്തിന് വിധേയമായാണ് ഈ നടപടി. നാഷനൽ സെന്റർ ഫോർ ഡിസീസ് കൺട്രോൾ സംഘമാണ് അന്വേഷണം നടത്തുന്നത്.
അതേസമയം, തുടർച്ചയായി മൂന്നാം ദിവസം പുതിയൊരാർക്കും നിപ്പ വൈറസ് ബാധിച്ചിട്ടില്ല. സമ്പർക്കപ്പട്ടികയിൽ പുതിയ ആളുകളൊന്നും ചേർത്തിട്ടില്ലെന്നും പുതിയ പരിശോധനാ ഫലങ്ങളൊന്നും ലഭിച്ചിട്ടില്ലെന്നും ആരോഗ്യവകുപ്പ് വ്യക്തമാക്കി. ഇതോടെ നിപ്പ വൈറസ് പടർപ്പ് ഭീതി കുറഞ്ഞുവരികയാണ്. ചികിത്സയിലുള്ള വീട്ടമ്മ ഇപ്പോഴും ഐസിയുവിൽ ഗുരുതരാവസ്ഥയിലാണ്
സമ്പർക്കപ്പട്ടികയിൽ ഉൾപ്പെടുത്തിയ രണ്ട് പേർ മഞ്ചേരി, എറണാകുളം മെഡിക്കൽ കോളേജുകളിൽ ഐസോലേഷനിലാണ്. ആരോഗ്യവകുപ്പിന്റെ ഫീവർ സർവേയുടെ ഭാഗമായി നടത്തിയ വീട് സന്ദർശനം പൂർത്തിയായി. നിപ്പ കോൾ സെന്ററിൽ ലഭിച്ച 15 കോളുകളിൽ 7 പേർക്ക് മാനസിക പിന്തുണ നൽകിയതായി അധികൃതർ അറിയിച്ചു.
