കുവൈത്ത് സിറ്റി : പ്രോഗ്രസീവ് പ്രൊഫഷണൽ ഫോറം (PPF) കുവൈത്ത്, 2026 ഫെബ്രുവരി 6-ന് മഹബുള്ള പാർക്ക് ഇൻ ബൈ റാഡിസൺ ഹോട്ടലിൽവെച്ച് വാർഷിക ജനറൽ ബോഡി യോഗവും TRANSCEND 2026 എന്ന പരിപാടിയും സംഘടിപ്പിച്ചു. കേരളത്തിലെ സ്റ്റാർട്ടപ്പ് മേഖലയിലെ വികസനവും നിക്ഷേപ സാധ്യതകളും ജിസിസി രാജ്യങ്ങളിലെ പ്രൊഫഷണൽ സമൂഹത്തിലേക്ക് എത്തിക്കുന്നതിനുള്ള ഒരു അന്തർദേശീയ സംവാദ വേദിയായി ഈ പരിപാടി മാറി.
TRANSCEND 2026-ന്റെ പ്രധാന ആകർഷണമായത് കേരള സ്റ്റാർട്ടപ്പ് മിഷൻ (KSUM) സിഇഒ അനൂപ്
അംബികയും, ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (IBPC) കുവൈത്ത് പ്രതിനിധിയായി പ്രവർത്തിക്കുന്ന അന്തർദേശീയ നിക്ഷേപ വിദഗ്ധൻ കാഷിഫ് സയ്യദും പങ്കെടുത്ത സംവാദം ആയിരുന്നു.ഈ സംവാദത്തിന്റെ മോഡറേറ്ററായി പി.പി.എഫ്. മുൻ പ്രസിഡന്റ് പ്രശാന്ത് വാര്യർ പ്രവർത്തിച്ചു.
കേരളത്തിന്റെ സ്റ്റാർട്ടപ്പ് ഇക്കോസിസ്റ്റത്തെ നിക്ഷേപകന്റെയും സ്ഥാപനങ്ങളുടെയും കാഴ്ചപ്പാടിലൂടെ വിശകലനം ചെയ്ത ഈ സംവാദത്തിൽ, നയരൂപീകരണം, ഇൻക്യൂബേഷൻ-ആക്സിലറേഷൻ മാതൃകകൾ, ഗവർണൻസ് ഗുണനിലവാരങ്ങൾ, ആഗോള വിപണികളുമായി സ്റ്റാർട്ടപ്പ് സംരംഭങ്ങളെ നേരിട്ടു ബന്ധിപ്പിക്കുന്നതിനുള്ള പ്രായോഗിക മാർഗങ്ങൾ എന്നിവ വിശദമായി ചർച്ച ചെയ്തു. സംരംഭങ്ങളുടെ സ്കെയിലിംഗ് ഘട്ടത്തിലെ വെല്ലുവിളികളും അന്താരാഷ്ട്ര വിപണികളിലേക്കുള്ള പ്രവേശന മാർഗങ്ങളും ചർച്ചയുടെ ഭാഗമായി.
സംവാദത്തിൽ പങ്കെടുത്തുകൊണ്ട്, കേരള സ്റ്റാർട്ടപ്പ് മിഷൻ സി.ഇ.ഒ. അനൂപ് അംബിക, പ്രോഗ്രസീവ് പ്രൊഫഷണൽ ഫോറം കുവൈത്ത് സംഘടിപ്പിക്കുന്ന TRANSCEND 2026 എന്ന സംവാദ പരിപാടി, ജിസിസി മേഖലയിലെ പ്രവാസി പ്രൊഫഷണൽ സമൂഹത്തെയും കേരളത്തിന്റെ മാറിവരുന്ന സാമ്പത്തിക-സംരംഭക പരിസരത്തെയും ബന്ധിപ്പിക്കുന്ന ഒരു തന്ത്രപരമായ നെറ്റ്വർക്കിംഗ് വേദിയായി മാറിയെന്നു സൂചിപ്പിച്ചു. സ്റ്റാർട്ടപ്പ് സംരംഭങ്ങളുമായി ബന്ധപ്പെട്ടുകൊണ്ടു നിക്ഷേപം, മെന്റർഷിപ്പ്, ഏൻജൽ ഫണ്ടിംഗ്, ആഗോള വിദഗ്ധത, സ്ഥാപന സഹകരണം, നെറ്റ്വർക്കിംഗ്, റിവേഴ്സ് ബ്രെയിൻ ഡ്രെയിൻ എന്നിവ ശക്തിപ്പെടുത്തുന്നതിലൂടെ കേരളത്തിന്റെ സംരംഭക പരിസരം വളർത്തുകയാണ് TRANSCEND 2026 ലിലൂടെ ലക്ഷ്യമിടുന്നത്.
ആദ്യഘട്ട സംരംഭങ്ങളെ പിന്തുണയ്ക്കുന്നതിലും നവീകരണാധിഷ്ഠിത സംരംഭങ്ങളെ പ്രോത്സാഹിപ്പിക്കുന്നതിലും സ്റ്റാർട്ടപ്പുകൾക്കും വ്യവസായ-സ്ഥാപനങ്ങൾക്കുമിടയിൽ സഹകരണം സാധ്യമാക്കുന്നതിലും KSUM വഹിക്കുന്ന പങ്കും അദ്ദേഹം വിശദീകരിച്ചു.
നിക്ഷേപകന്റെ കാഴ്ചപ്പാടിൽ നിന്ന് സംസാരിച്ച കാഷിഫ് സയ്യദ്, നിക്ഷേപ തീരുമാനങ്ങളിൽ ഗവർണൻസ്, പ്രവചനക്ഷമത, നിർവഹണ ശാസ്ത്രം എന്നിവയുടെ പ്രാധാന്യം ഊന്നിപ്പറഞ്ഞു. വ്യക്തമായ സംവിധാനങ്ങളും വിശ്വാസയോഗ്യമായ പ്രവർത്തന ഘടനകളും ഉള്ള ഇടങ്ങളിലേക്കാണ് നിക്ഷേപം ഒഴുകുന്നതെന്നും അദ്ദേഹം വ്യക്തമാക്കി.
കേരളത്തിലെ സ്റ്റാർട്ടപ്പുകൾക്ക് ആവശ്യമായ മെന്റർഷിപ്പ്, തന്ത്രപരമായ പങ്കാളിത്തങ്ങൾ, മൂലധന പിന്തുണ എന്നിവയും സംവാദത്തിൽ ചർച്ചയായി. സ്ഥിരതയുള്ള നയരൂപീകരണവും സ്ഥാപനപരമായ പക്വതയും ദീർഘകാല നിക്ഷേപങ്ങൾ ആകർഷിക്കുന്നതിൽ നിർണായകമാണെന്ന് അനൂപ് അഭിപ്രായപ്പെട്ടു.
ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (IBPC) സെക്രട്ടറി സുരേഷ് കെ. പി., ഇത്തരത്തിലുള്ള സാങ്കേതിക വേദികൾ ഇന്ത്യൻ സംസ്ഥാനങ്ങളെ ആഗോള ബിസിനസ് സമൂഹവുമായി ബന്ധിപ്പിക്കുന്നതിൽ നിർണായക പങ്ക് വഹിക്കുന്നു എന്ന് സൂചിപ്പിച്ചു. അടിസ്ഥാന സൗകര്യ വികസനം, നയപരമായ പിന്തുണ, ശക്തമായ നവീകരണപരിസരം എന്നിവയുടെ പിന്തുണയോടെ കേരളം ഇന്ന് ശക്തമായ നിക്ഷേപ സാധ്യതകൾ വാഗ്ദാനം ചെയ്യുന്ന സംസ്ഥാനമായി മാറിയെന്നു അദ്ദേഹം പറഞ്ഞു.കേരളത്തിലെ സമ്പന്നമായ ടാലന്റ് പൂളും, സ്റ്റാർട്ടപ്പ് സൗഹൃദ നയങ്ങളും, ഡിജിറ്റൽ അടിസ്ഥാന സൗകര്യങ്ങളും, സർക്കാരിന്റെ സജീവ ഇടപെടലുകളും കേരളത്തെ സംരംഭകർക്കും പ്രവാസികൾക്കും ഏറ്റവും ആകർഷകമായ ഒരു നിക്ഷേപ കേന്ദ്രമാക്കുന്നുവെന്നും അദ്ദേഹം കൂട്ടിച്ചേർത്തു.
ഐടി, ഡിജിറ്റൽ സേവനങ്ങൾ, ആരോഗ്യ-ലൈഫ് സയൻസ്, നിർമ്മാണ-എഞ്ചിനീയറിംഗ്, ശുദ്ധ ഊർജ്ജം, സുസ്ഥിരത, അഗ്രിടെക്, ടൂറിസം, ഹോസ്പിറ്റാലിറ്റി, ഗവേഷണ സ്ഥാപനങ്ങളുടെ പിന്തുണയോടെ ഉയർന്നുവരുന്ന ഡീപ് ടെക് മേഖലകൾ എന്നിവയിലാണ് നിലവിൽ കേരളത്തിന്റെ സ്റ്റാർട്ടപ്പ്-നിക്ഷേപ ശ്രദ്ധ കേന്ദ്രീകരിച്ചിരിക്കുന്നത്.
TRANSCEND പോലുള്ള പരിപാടികളിലൂടെ പ്രൊഫഷണൽ വികസനം, സംരംഭകത്വം, നവീകരണം, അന്തർദേശീയ നിക്ഷേപം എന്നിവയെക്കുറിച്ചുള്ള ബോധപൂർവമായ സംവാദങ്ങൾക്ക് വേദിയൊരുക്കുന്നതിലും നിക്ഷേപ സമാഹരണമുൾപ്പെടെ കേരള സ്റ്റാർട്ടപ്പ് മിഷന്റെ ഭാവി പ്രവർത്തനങ്ങളിൽ PPF കുവൈറ്റിന്റെ സംഘടനാനേതൃത്വം തുടർന്നും സജീവമായി ഇടപെടണം എന്ന് അനൂപ് ആവശ്യപ്പെട്ടു.
തുടർന്ന്, സ്വാഗതസംഘം ചെയർമാൻ ഗോപീകൃഷ്ണൻ യോഗത്തിനു നന്ദി പറഞ്ഞു.
