കുവൈറ്റ്: ‘സഹേൽ’ ആപ്പിലൂടെ ഗാർഹിക തൊഴിലാളിയുടെ നിയമനത്തിന് യോഗ്യത പരിശോധിക്കാനുള്ള പുതിയ സേവനം ആരംഭിച്ചതായി കുവൈത്തിലെ ആഭ്യന്തര മന്ത്രാലയം അറിയിച്ചു. ഇതിനായി ഉപയോക്താക്കൾക്ക് ഗാർഹിക തൊഴിലാളിയുടെ പാസ്പോർട്ട് നമ്പറും പൗരത്വവും നൽകുക മാത്രമാണ് വേണ്ടത്. തുടർന്ന്, ആ വ്യക്തിക്കായി ഇതിനകം ഒരു വിസ അനുവദിച്ചിട്ടുണ്ടോ എന്ന് ഉടൻ തന്നെ ആപ്പ് കാണിച്ചുതരും. ഈ സംവിധാനം വഴി ഒരേ വ്യക്തിക്കായി ഒരേ സമയം പല വിസകളും അപേക്ഷിക്കപ്പെടുന്നതും അപേക്ഷകൾ നിരസിക്കപ്പെടുന്നതും ഒഴിവാക്കാൻ സാധിക്കും. നിയമന നടപടികൾ ആരംഭിക്കുന്നതിന് മുമ്പ് ഗാർഹിക തൊഴിലാളിയുടെ യോഗ്യത ഉറപ്പാക്കാൻ സഹായിക്കുന്നതാണ് ഈ പുതിയ സേവനത്തിന്റെ പ്രധാന ലക്ഷ്യം.
