കുവൈറ്റ് സിറ്റി : അറേബ്യൻ ഗൾഫ് സ്ട്രീറ്റിന്റെ എഞ്ചിനീയേഴ്സ് അസോസിയേഷൻ കവല മുതൽ സെക്കൻഡ് റിംഗ് റോഡ്, അറേബ്യൻ ഗൾഫ് സ്ട്രീറ്റ് എന്നിവയുടെ കവല വരെയുള്ള ഭാഗം പൂർണമായും അടച്ചിടുമെന്ന് ആഭ്യന്തര മന്ത്രാലയം ഗതാഗത, പ്രവർത്തന കാര്യ മേഖലയിലൂടെ അറിയിച്ചു.
ഈ മാസം 8 വ്യാഴാഴ്ച വൈകുന്നേരം 6:00 മണിക്ക് അടച്ചിടൽ ആരംഭിക്കുമെന്നും 11-ാം തീയതി ഞായറാഴ്ച പുലർച്ചെ 5:00 വരെ അറ്റകുറ്റപ്പണികൾ പൂർത്തീകരിക്കുന്നതിനായി തുടരുമെന്നും ബുധനാഴ്ച പുറത്തിറക്കിയ പത്രക്കുറിപ്പിൽ മന്ത്രാലയം അറിയിച്ചു.
അറ്റകുറ്റപ്പണി കാലയളവിൽ സുഗമമായ ഗതാഗതവും പൊതു സുരക്ഷയും ഉറപ്പാക്കാൻ വാഹനമോടിക്കുന്നവർ ഗതാഗത നിർദ്ദേശങ്ങൾ പാലിക്കാനും ബദൽ വഴികൾ ഉപയോഗിക്കാനും സ്ഥലത്തെ സുരക്ഷാ ഉദ്യോഗസ്ഥരുമായി സഹകരിക്കാനും അഭ്യർത്ഥിച്ചിട്ടുണ്ട്.
