കുവൈത്ത് സിറ്റി: സ്വകാര്യ മേഖലയിലെ ജീവനക്കാരുടെ ശമ്പള വിതരണം കൂടുതൽ വേഗത്തിലും സുതാര്യമായും സുരക്ഷിതമായും ഉറപ്പാക്കുന്നതിനായി കുവൈത്ത് സെൻട്രൽ ബാങ്ക് കുവൈത്ത് വേജ് പ്രൊട്ടക്ഷൻ ആൻഡ് പേയ്മെന്റ് സിസ്റ്റം (KWPS) ആരംഭിച്ചു.
പ്രാദേശിക ബാങ്കുകൾ വഴിയുള്ള ശമ്പള കൈമാറ്റങ്ങൾ ഏകോപിപ്പിക്കുന്നതിനായി കേന്ദ്രീകൃത പ്ലാറ്റ്ഫോമായാണ് പുതിയ സംവിധാനം പ്രവർത്തിക്കുക. ശമ്പള വിതരണം നിരീക്ഷിക്കാനും കാലതാമസമോ മറ്റ് നിയമലംഘനങ്ങളോ ഉണ്ടായാൽ അവ നേരത്തെ കണ്ടെത്താനും ഇതിലൂടെ അധികൃതർക്ക് സാധിക്കും.
തൊഴിലാളികളുടെ അവകാശ സംരക്ഷണത്തിനൊപ്പം ഡിജിറ്റൽ പേയ്മെന്റുകൾ പ്രോത്സാഹിപ്പിക്കുന്നതിനും സാമ്പത്തിക ഉൾപ്പെടുത്തൽ വർധിപ്പിക്കുന്നതിനും തൊഴിൽ വിപണിയിലെ നിയന്ത്രണം മെച്ചപ്പെടുത്തുന്നതിനും KWPS സഹായിക്കുമെന്നാണ് പ്രതീക്ഷിക്കുന്നത്.
കുവൈത്തിന്റെ നാഷണൽ പേയ്മെന്റ്സ് സിസ്റ്റം പദ്ധതിയുടെ രണ്ടാം ഘട്ടത്തിൽ ആരംഭിക്കുന്ന മൂന്നാമത്തെ സംവിധാനമാണിത്. 2026 ജനുവരിയിൽ കുവൈത്ത് ഓട്ടോമേറ്റഡ് ക്ലിയറിംഗ് സിസ്റ്റം (KACH), ഫെബ്രുവരിയിൽ കുവൈത്ത് ഓക്ഷൻ മാനേജ്മെന്റ് സിസ്റ്റം (KDMS) എന്നിവ ആരംഭിച്ചിരുന്നു.
