മലപ്പുറം:അവധിക്കാലത്തും ഒഴിവുദിവസങ്ങളിലും വിദ്യാഭ്യാസ സ്ഥാപനങ്ങൾ പ്രവർത്തിക്കുന്നുണ്ടെങ്കിൽ, വിദ്യാർഥികൾക്ക് ബസ് യാത്രയ്ക്ക് നിർബന്ധമായും കൺസെഷൻ അനുവദിക്കണമെന്ന് ജില്ലാ കളക്ടർ വി.ആർ. വിനോദ് ഉറപ്പുവരുത്തി. കണ്ടക്ടർ ആവശ്യപ്പെടുന്നപക്ഷം വിദ്യാർഥികൾ തങ്ങളുടെ കൺസെഷൻ കാർഡും ഐഡി കാർഡും പ്രദർശിപ്പിക്കേണ്ടത് നിർബന്ധമാണെന്നും അദ്ദേഹം വ്യക്തമാക്കി.സ്റ്റുഡന്റ്‌സ് ട്രാവലിങ് ഫെസിലിറ്റി കമ്മിറ്റിയുടെ യോഗത്തിൽ അധ്യക്ഷതവഹിക്കുകയായിരുന്നു അദ്ദേഹം. ഈ യോഗത്തിൽ പോലീസ്, മോട്ടോർ വാഹന വകുപ്പ് ഉദ്യോഗസ്ഥർ, ബസ് ഉടമസംഘടനകളുടെ പ്രതിനിധികൾ, വിദ്യാർഥി സംഘടനാ നേതാക്കൾ എന്നിവർ പങ്കെടുത്തിരുന്നു.
