കുവൈറ്റ് സിറ്റി : വിശ്വാസം മുറുകെപ്പിടിച്ച് എല്ലാവർക്കും സാഹോദര്യത്തോടെ ജീവിക്കാനുള്ള സാഹചര്യം നിലനിൽക്കാൻ മനുഷ്യർ പരസ്പരം സഹകരിച്ച് പ്രവർത്തിക്കണമെന്ന് ഐ സി എഫ് ഫഹാഹീൽ റീജിയൻ സംഘടിപ്പിച്ച സ്നേഹവിരുന്ന് അഭിപ്രായപ്പെട്ടു. പരസ്പരം ഉൾക്കൊണ്ട് മതങ്ങൾ തമ്മിലുള്ള ആരോഗ്യകരമായ സംവാദങ്ങൾക്കുള്ള പ്രതലങ്ങൾ സമൂഹത്തിൽ ഉണ്ടാവണം. തിരുവസന്തം@1500 മീലാദ് കാമ്പയിൻ ഭാഗമായി നടന്ന സ്നേഹവിരുന്നിൽ, തിരുനബി (സ്വ) യുടെ അദ്ധ്യാപനങ്ങളുടെ വിവിധ അടരുകൾ പങ്കുവെച്ചു. മങ്കഫിൽ നടന്ന സംഗമം റീജിയൻ പ്രസിഡൻ്റ് ശംസുദ്ധീൻ സഖാഫിയുടെ അധ്യക്ഷതയിൽ നാഷനൽ കാബിനറ്റ് മെമ്പർ ശുക്കൂർ മൗലവി കൈപ്പുറം ഉദ്ഘാടനം ചെയ്തു. അബ്ദുള്ള
വടകര സന്ദേശ ഭാഷണം നടത്തി. ബോബിൻ ജോർജ് എടപ്പാട്ട്, ബിനോയ് ചന്ദ്രൻ, ശ്യാം ജി നായർ, മുനീർ പെരുമുഖം, സഹദ് മൂസ എന്നിവർ വിഷയാസ്പദമായി സംവദിച്ചു. അബൂബക്കർ സിദ്ദീഖ് കൂട്ടായി സ്വാഗതവും അബുതാഹിർ ചെരിപ്പൂർ നന്ദിയും പറഞ്ഞു.
