ഡൽഹി: പാകിസ്ഥാൻ വിവിധ ആയുധങ്ങൾ ഉപയോഗിച്ച് ഇന്ത്യയുടെ സൈനിക താവളങ്ങളുടെ നേരെ തുടർച്ചയായ ആക്രമണങ്ങൾ നടത്തിയെന്ന് ഇന്ത്യൻ സൈന്യത്തിന്റെ പ്രതിനിധി കേണൽ സോഫിയ ഖുറേഷി വ്യക്തമാക്കി. ശ്രീനഗർ, ഉദ്ധംപൂർ, പഠാൻകോട്ട്, ആദംകോട് തുടങ്ങിയ പ്രദേശങ്ങളിലെ സൈനിക സ്ഥാപനങ്ങൾ ലക്ഷ്യമാക്കിയായിരുന്നു ഈ ആക്രമണം. എന്നാൽ, ഇന്ത്യയുടെ സൈനിക സംവിധാനങ്ങൾ ഫലപ്രദമായി പ്രവർത്തിച്ച് ഈ ആക്രമണങ്ങൾക്ക് കർശനമായ തിരിച്ചടി നൽകിയെന്നും അവർ വിശദീകരിച്ചു.
വാർത്താസമ്മേളനത്തിൽ വിദേശകാര്യ സെക്രട്ടറി വിക്രം മിർസി, എയർ ഫോഴ്സ് വിംഗ് കമാൻഡർ വ്യോമിക സിംഗ് എന്നിവരും ഉണ്ടായിരുന്നു. പാകിസ്ഥാൻ തങ്ങളുടെ സൈനിക താവളങ്ങളിൽ നിന്ന് മാത്രമല്ല, സിവിലിയൻ വിമാനങ്ങളുടെ മറ പിടിച്ചും ഇന്ത്യൻ ലക്ഷ്യങ്ങളെ ആക്രമിച്ചതായി കേണൽ സോഫിയ ഖുറേഷി ചൂണ്ടിക്കാട്ടി. ഇതിനെത്തുടർന്ന്, ഇന്ത്യൻ പ്രതിരോധ സേന ഫലപ്രദമായ തിരിച്ചടി നടത്തിയെന്നും അവർ വ്യക്തമാക്കി.
അതേസമയം, പാകിസ്ഥാൻ ഇന്ത്യയുടെ S-400 എയർ ഡിഫൻസ് സിസ്റ്റം, ബ്രഹ്മോസ് മിസൈൽ സൗകര്യങ്ങൾ തുടങ്ങിയ പ്രധാനപ്പെട്ട പ്രതിരോധ സംവിധാനങ്ങൾ നശിപ്പിച്ചെന്ന് വ്യാജവാർത്ത പ്രചരിപ്പിച്ചുവെന്നും ഇന്ത്യ ആരോപിച്ചു. ഈ അവകാശവാദങ്ങൾ പൂർണ്ണമായും ഇന്ത്യൻ അധികൃതർ നിരാകരിച്ചു.
പാകിസ്ഥാൻ അതിർത്തിയിൽ സൈനിക വിന്യാസം വർദ്ധിപ്പിച്ചിട്ടുണ്ടെന്നും, ടെറിറ്റോറിയൽ ആർമി ഉൾപ്പെടെയുള്ള ഇന്ത്യൻ സൈനിക ശക്തികൾ ഉയർന്ന ജാഗ്രതയോടെ സജ്ജമാണെന്നും വ്യക്തമാക്കി. യുദ്ധവിമാനങ്ങൾ, മിസൈലുകൾ, ഡ്രോണുകൾ, യുകാബ് തുടങ്ങിയ ആധുനിക ആയുധങ്ങൾ ഉപയോഗിച്ചാണ് പാകിസ്ഥാൻ ഈ ആക്രമണങ്ങൾ നടത്തിയത്. ഇന്ത്യയുടെ വ്യോമസീമയിലെ ചില താവളങ്ങൾക്ക് ചെറിയ നാശനഷ്ടങ്ങൾ സംഭവിച്ചെങ്കിലും, എല്ലാ ആക്രമണങ്ങളും ഇന്ത്യ ഫലപ്രദമായി തടയുകയാണുണ്ടായതെന്ന് ഇന്ത്യൻ പ്രതിരോധ മന്ത്രാലയം ഊന്നിപ്പറഞ്ഞു.
