കുവൈറ്റ് സിറ്റി : കുവൈറ്റിലെ സൈനിക വ്യോമതാവളത്തിന് നേരെ മിസൈൽ ആക്രമണം ഉണ്ടായതായി സോഷ്യൽ മീഡിയയിൽ പ്രചരിക്കുന്ന അഭ്യൂഹങ്ങൾ കുവൈറ്റ് ആർമി ജനറൽ സ്റ്റാഫ് ശക്തമായി നിഷേധിച്ചു. കുവൈത്തിന്റെ പ്രാദേശിക പരമാധികാരം അതേപടി നിലനിൽക്കുന്നുവെന്നും, ഏതെങ്കിലും തരത്തിലുള്ള ആക്രമണങ്ങളിൽ നിന്നോ ലംഘനങ്ങളിൽ നിന്നോ പൗരന്മാരെയും താമസക്കാരെയും സംരക്ഷിക്കുന്നതിന് ആവശ്യമായ എല്ലാ നടപടികളും നിലവിലുണ്ടെന്നും സൈന്യം ഔദ്യോഗിക പ്രസ്താവനയിൽ ഊന്നിപ്പറഞ്ഞു. സ്ഥിരീകരിക്കാത്ത വിവരങ്ങൾ പ്രചരിപ്പിക്കുന്നതിൽ നിന്ന് വിട്ടുനിൽക്കാനും വാർത്തകൾക്കായി ഔദ്യോഗികവും വിശ്വസനീയവുമായ ഉറവിടങ്ങളെ മാത്രം ആശ്രയിക്കാനും പ്രസ്താവന പൊതുജനങ്ങളോട് അഭ്യർത്ഥിച്ചു.
