കുവൈത്ത് സിറ്റി : കുവൈത്ത് അന്താരാഷ്ട്ര വിമാനത്താവളത്തെ ലക്ഷ്യമിട്ട് നിരവധി ഡ്രോൺ ആക്രമണങ്ങൾ നടന്നതായി കുവൈത്തിലെ സിവിൽ ഏവിയേഷൻ അതോറിറ്റിയുടെ വക്താവ് അബ്ദുല്ല അൽ-രാജി അറിയിച്ചു. ആക്രമണത്തിൽ ആളപായമൊന്നും റിപ്പോർട്ട് ചെയ്തിട്ടില്ലെന്നും ചെറിയ തോതിൽ മാത്രമാണ് ഭൗതിക നാശനഷ്ടങ്ങൾ ഉണ്ടായതെന്നും അദ്ദേഹം വ്യക്തമാക്കി. ശനിയാഴ്ച കുവൈത്ത് ന്യൂസ് ഏജൻസിയോട് നടത്തിയ പ്രസ്താവനയിൽ, ഈ സംഭവത്തെ തുടർന്ന് വിമാനത്താവളത്തിലെ റഡാർ സംവിധാനത്തിന് ഗണ്യമായ കേടുപാടുകൾ സംഭവിച്ചതായി അദ്ദേഹം പറഞ്ഞു. സംഭവത്തെ തുടർന്ന് അടിയന്തര സംഘങ്ങളും ബന്ധപ്പെട്ട അധികാരികളും ഉടൻ സ്ഥലത്തെത്തി. സ്ഥിതിഗതികൾ വിലയിരുത്തുകയും വിമാനത്താവളത്തിലെ പ്രവർത്തനങ്ങളുടെ സുരക്ഷ ഉറപ്പാക്കുന്നതിനും വേഗത്തിൽ പൂർണ്ണ പ്രവർത്തനക്ഷമത പുനഃസ്ഥാപിക്കുന്നതിനുമായി ആവശ്യമായ നടപടികൾ സ്വീകരിച്ചതായും അൽ-രാജി കൂട്ടിച്ചേർത്തു. കുവൈത്തിലെ സിവിൽ വ്യോമഗതാഗതത്തിന്റെ സുരക്ഷയും സുരക്ഷിതത്വവും ഉറപ്പാക്കുന്നതിന് ബന്ധപ്പെട്ട വകുപ്പുകളുമായി സഹകരിച്ച് എല്ലാ ആവശ്യമായ നടപടികളും സ്വീകരിക്കാൻ അതോറിറ്റി പ്രതിബദ്ധമാണെന്നും അദ്ദേഹം അറിയിച്ചു.
