കുവൈറ്റ് സിറ്റി: കേരള ആർട്ട് ലവേഴ്സ് അസോസിയേഷൻ – കല കുവൈറ്റ് അംഗങ്ങൾക്കായി വർഷം തോറും നടത്തിവരുന്ന ക്രിക്കറ്റ് ടൂർണമെന്റിലെ ഈ വർഷത്തെ ഫൈനൽ മത്സരം നവംബർ 21 വെള്ളിയാഴ്ച അബൂഹലീഫ ക്രിക്കറ്റ് ഗ്രൗണ്ടിൽ നടന്നു. ആവേശകരമായ ഈ ഫൈനൽ മത്സരത്തിൽ അബ്ബാസിയ സൗത്ത് സീ ആറോവറിൽ നേടിയ 79 റൺസിനെതിരെ 5 ഓവറിൽ 2 വിക്കറ്റ് നഷ്ടത്തിൽ വിജയലക്ഷ്യം മറികടന്നുകൊണ്ട് ജലീബ് എ ചാമ്പ്യന്മാരായി.
25 ഓളം ടീമുകൾ പങ്കെടുത്തുകൊണ്ട് നവംബർ 14, വെള്ളിയാഴ്ച്ച നടന്ന ആദ്യഘട്ട മത്സരങ്ങൾക്ക് ശേഷമാണ് ഈ ഫൈനൽ മത്സരം നടന്നത്. ആദ്യ ദിനം നടന്ന ഉദ്‌ഘാടന ചടങ്ങ് കല കുവൈറ്റ് വൈസ് പ്രസിഡന്റ്‌ പി വി പ്രവീണിന്റെ അധ്യക്ഷതയിൽ പ്രസിഡന്റ്‌ മാത്യു ജോസഫ് ഉദ്ഘാടനം ചെയ്തു. ജനറൽ സെക്രട്ടറി ടി വി ഹിക്മത് ആശംസ അർപ്പിച്ചു സംസാരിച്ചു. ട്രഷറര്‍ പി വി സുരേഷ് കൂടാതെ കേന്ദ്ര കമ്മിറ്റി അംഗങ്ങളും ചടങ്ങിൽ സംബന്ധിച്ചു. കായിക വിഭാഗം സെക്രട്ടറി ശരത് ചന്ദ്രൻ സ്വാഗതം ആശംസിച്ച ചങ്ങിന് ടൂർണമെന്റിന്റെ ജനറൽ കൺവീനർ ഷിജു ജോസ് നന്ദി രേഖപ്പെടുത്തി.
രണ്ട് ദിനങ്ങളിലുമായി ഒട്ടേറെ കായിക പ്രേമികൾ മത്സരം വീക്ഷിക്കാൻ എത്തിച്ചേർന്നു. മത്സരശേഷം നടന്ന സമ്മാനദാന ചടങ്ങിൽ കല കുവൈറ്റ് പ്രസിഡന്റ്‌ മാത്യു ജോസഫ്, ജനറൽ സെക്രട്ടറി ടി വി ഹിക്മത്, കായിക വിഭാഗം സെക്രട്ടറി ശരത് ചന്ദ്രൻ എന്നിവർ ടൂർണമെന്റിൽ പങ്കെടുത്ത ടീമുകൾക്ക് അഭിനന്ദനങ്ങൾ അറിയിച്ചു സംസാരിച്ചു. തുടർന്ന് വിജയികൾക്കും റണ്ണേഴ്സപ്പിനുമുള്ള ട്രോഫികൾ പ്രസിഡന്റും ജനറൽ സെക്രട്ടറിയും ചേർന്ന് കൈമാറി. വ്യക്തിഗത ഇനങ്ങളിൽ മാൻ ഓഫ് ദി ടൂർണമെന്റായും ബെസ്റ്റ് ബോളറായും ജിതിൻ ജോസും, മാൻ ഓഫ് ദി മാച്ചായി പീറ്ററും, ബെസ്റ്റ് ബാറ്റ്സ്മാനായി ജിതിൻ മണിയും തെരെഞ്ഞെടുക്കപ്പെട്ടു. വ്യക്തിഗത സമ്മാനങ്ങൾ കേന്ദ്ര കമ്മിറ്റി അംഗങ്ങളും നാല് മേഖല പ്രസിഡന്റുമാരും ചേർന്ന് കൈമാറി.
