പത്തനംതിട്ട: നീറ്റ് പരീക്ഷയ്ക്ക് വ്യാജ ഹാൾ ടിക്കറ്റ് നിർമ്മിച്ച സംഭവത്തിൽ തിരുവനന്തപുരം നെയ്യാറ്റിൻകരയിലെ അക്ഷയ സെന്റർ ജീവനക്കാരിയായ ഗ്രീഷ്മയെ പൊലീസ് കസ്റ്റഡിയിലെടുത്തു. പത്തനംതിട്ട തൈക്കാവ് വിഎച്ച്എസ് സ്കൂളിൽ 2025 മേയ് 4-ന് നടന്ന നീറ്റ് പരീക്ഷയ്ക്ക് ഒരു വിദ്യാർഥി വ്യാജ ഹാൾടിക്കറ്റുമായി എത്തിയതോടെയാണ് സംഭവം വെളിപ്പെട്ടത്. പരീക്ഷാ ഹാളിൽ തന്നെ ഹാൾടിക്കറ്റ് പരിശോധിക്കവേ ക്രമക്കേട് കണ്ടെത്തിയ പൊലീസ് ആദ്യം വിദ്യാർഥിയെയും പിന്നീട് അദ്ദേഹത്തിന്റെ അമ്മയെയും തടഞ്ഞു. തുടർന്നുള്ള അന്വേഷണത്തിൽ വ്യാജ ടിക്കറ്റ് നൽകിയത് അക്ഷയ സെന്റർ ജീവനക്കാരിയായ ഗ്രീഷ്മയാണെന്ന് വ്യക്തമായി.
അന്വേഷണത്തിൽ വെളിപ്പെട്ടതനുസരിച്ച്, വിദ്യാർഥിയുടെ അമ്മ നീറ്റ് പരീക്ഷയ്ക്കായി ആവശ്യമായ രേഖകൾ ഗ്രീഷ്മയ്ക്ക് ഏൽപ്പിച്ചിരുന്നു. എന്നാൽ അപേക്ഷ സമർപ്പിക്കാൻ താൻ മറന്നുപോയെന്നും, പിന്നീട് ഹാൾടിക്കറ്റ് ആവശ്യപ്പെട്ടപ്പോൾ വ്യാജമായി തയ്യാറാക്കി നൽകിയെന്നുമാണ് ഗ്രീഷ്മ പൊലീസിന് മൊഴി നൽകിയത്. വ്യാജ ടിക്കറ്റിൽ ഒരിടത്ത് പരീക്ഷ എഴുതിയ വിദ്യാർഥിയുടെ പേരും, മറ്റൊരിടത്ത് തിരുവനന്തപുരത്തെ മറ്റൊരു വിദ്യാർഥിയുടെ പേരും ചേർത്തിരുന്നു. എന്നാൽ ആ വിദ്യാർഥി തിരുവനന്തപുരത്തെ മറ്റൊരു സെന്ററിൽ യഥാർത്ഥ ഹാൾടിക്കറ്റുമായി പരീക്ഷ എഴുതിയിരുന്നു.
സംഭവത്തിൽ പരീക്ഷാ നിയന്ത്രണാധികാരിയുടെ പരാതിയനുസരിച്ച് പൊലീസ് ആദ്യം വിദ്യാർഥിയ്ക്കും അമ്മയ്ക്കും എതിരെ കേസെടുത്തിരുന്നു. എന്നാൽ അവർ ഗ്രീഷ്മയുടെ പ്രവൃത്തി അറിയാതിരുന്നുവെന്നും, അക്ഷയ സെന്ററിൽ നിന്നാണ് ഹാൾടിക്കറ്റ് ലഭിച്ചതെന്നും മൊഴി നൽകി. ഇതിനെ തുടർന്നാണ് നെയ്യാറ്റിൻകര അക്ഷയ സെന്ററിലെത്തിയ പൊലീസ് ഗ്രീഷ്മയെ തടഞ്ഞത്.
വിശദാംശങ്ങൾ അന്വേഷിക്കുന്ന പൊലീസിന് മുന്നിൽ ഗ്രീഷ്മ നാല് മാസം മാത്രമായാണ് ഈ സെന്ററിൽ ജോലി ചെയ്തിരുന്നതെന്ന് സ്ഥാപന ഉടമസ്ഥർ വിവരം നൽകിയിട്ടുണ്ട്. കൂടുതൽ പങ്കാളികൾ ഉണ്ടോ എന്നതുൾപ്പെടെയുള്ള വിവരങ്ങൾക്ക് പൊലീസ് അനോഷണം തുടങ്ങി.
