കുവൈറ്റ് സിറ്റി : കുവൈത്ത് ആരോഗ്യ മന്ത്രാലയം ജീവനക്കാരുടെ ഹാജർ രേഖപ്പെടുത്തലും ഡ്യൂട്ടി അവസാനിപ്പിക്കുന്നതും സുഗമമാക്കുന്നതിനായി ആരോഗ്യ ജില്ലകൾ, ആശുപത്രികൾ, മന്ത്രാലയത്തിന്റെ ജനറൽ ഓഫീസ് എന്നിവിടങ്ങളിൽ സ്ഥിരം സ്മാർട്ട് ഫിംഗർപ്രിന്റ് ഉപകരണങ്ങൾ സ്ഥാപിക്കാൻ നിർദേശം നൽകി.
അഡ്മിനിസ്ട്രേറ്റീവ് അഫയേഴ്സ് അസിസ്റ്റന്റ് അണ്ടർസെക്രട്ടറി ഡോ. ഫാത്തിമ അൽ-നജ്ജാർ പുറത്തിറക്കിയ അഡ്മിനിസ്ട്രേറ്റീവ് സർക്കുലർ പ്രകാരം, വ്യക്തിഗത ഫിംഗർപ്രിന്റ് ഉപകരണങ്ങളിൽ സാങ്കേതിക തകരാർ നേരിടുന്ന ജീവനക്കാർക്കും സാധാരണ ഡ്യൂട്ടി, ഓൺ-കാൾ ഡ്യൂട്ടി, ഓവർടൈം സമയങ്ങളിൽ സ്മാർട്ട് ഫിംഗർപ്രിന്റ് ആപ്ലിക്കേഷൻ ഉപയോഗിക്കാൻ കഴിയാത്തവർക്കും ജോലിസ്ഥലത്ത് ലഭ്യമായ ടാബ്ലെറ്റ് ഉപകരണം വഴി ഹാജർ രേഖപ്പെടുത്താം. സിസ്റ്റം തകരാറുകൾ മൂലം ജീവനക്കാരെ അനധികൃതമായി ഹാജരാകാത്തവരായി രേഖപ്പെടുത്തുന്നത് ഒഴിവാക്കുന്നതിനാണ് ഈ ബദൽ സംവിധാനം.
സ്ഥിരം ഫിംഗർപ്രിന്റ് ഉപകരണങ്ങൾ എല്ലായ്പ്പോഴും പ്രവർത്തനക്ഷമമാണെന്ന് ഉറപ്പാക്കാനും സാങ്കേതിക തകരാറുകൾ ഉണ്ടായാൽ ഉടൻ റിപ്പോർട്ട് ചെയ്ത് പരിഹരിക്കാനും ബന്ധപ്പെട്ട വിഭാഗങ്ങൾക്ക് മന്ത്രാലയം നിർദേശം നൽകി.
സിസ്റ്റത്തിലെ സാങ്കേതിക പ്രശ്നങ്ങൾ കാരണം ജീവനക്കാരുടെ അവകാശങ്ങൾ ബാധിക്കാതിരിക്കാനും ഹാജർ നടപടികൾ തടസ്സമില്ലാതെ തുടരാനുമാണ് പുതിയ സംവിധാനം ലക്ഷ്യമിടുന്നത്.
