കുവൈറ്റ് സിറ്റി : കുവൈത്തിലെ പ്രാദേശിക വിപണികളിൽ ചെമ്മീൻ വില കുറഞ്ഞു. മത്സ്യബന്ധന സീസൺ ആരംഭിച്ച് ഒരാഴ്ച പിന്നിടുന്നതിനിടെ ലഭ്യത വർധിച്ചതും ഉപഭോക്താക്കളുടെ ആവശ്യം കൂടിയതുമാണ് വില കുറയാൻ കാരണമായത്.
അൽ-കൗട്ട്, ഷാർഖ് മത്സ്യ മാർക്കറ്റുകളിൽ ഇന്ന് ഏകദേശം 840 കൊട്ട ചെമ്മീൻ ലേലം ചെയ്തു. ഇതോടെ വിപണിയിൽ ചെമ്മീന്റെ ലഭ്യത വർധിക്കുകയും വില താഴുകയും ചെയ്തു. വലുപ്പവും ഗുണനിലവാരവും അനുസരിച്ച് ഒരു കൊട്ടയ്ക്ക് 40 മുതൽ 45 കുവൈത്തി ദിനാർ വരെയാണ് വില.
ദിവസേനയുള്ള മത്സ്യബന്ധന യാത്രകളിൽ നിന്നുള്ള ചെമ്മീൻ വരവ് തുടരുന്നത് സീസണിന്റെ തുടക്കത്തെ അപേക്ഷിച്ച് വില കുറയാൻ കാരണമായിട്ടുണ്ടെന്ന് മത്സ്യത്തൊഴിലാളി യൂണിയൻ മേധാവി അബ്ദുല്ല അൽ-സർഹീദ് പറഞ്ഞു. ലഭ്യത വർദ്ധിക്കുന്നതിനനുസരിച്ച് വരും ദിവസങ്ങളിൽ വില കൂടുതൽ സ്ഥിരത കൈവരിക്കുമെന്ന് അദ്ദേഹം പ്രതീക്ഷിക്കുന്നു.
മത്സ്യവില ഉയർന്നതിനെ തുടർന്ന് മത്സ്യം വാങ്ങുന്നത് ബഹിഷ്കരിക്കണമെന്ന പ്രചാരണങ്ങൾ വിപണിയിലെ യഥാർഥ സാഹചര്യം പൂർണമായി പ്രതിഫലിപ്പിക്കുന്നില്ലെന്നും അൽ-സർഹീദ് വ്യക്തമാക്കി. മത്സ്യത്തൊഴിലാളികൾ നേരിടുന്ന മത്സ്യബന്ധന ചെലവും പ്രവർത്തനച്ചെലവുകളും വില നിർണയിക്കുമ്പോൾ പരിഗണിക്കേണ്ടതുണ്ടെന്നും അദ്ദേഹം പറഞ്ഞു.
പ്രാദേശിക മത്സ്യവില ഉയരാൻ സമീപകാലത്തെ പ്രാദേശിക സുരക്ഷാ സാഹചര്യങ്ങളും നാവിഗേഷൻ നിയന്ത്രണങ്ങളും പ്രധാന കാരണങ്ങളാണെന്നും അദ്ദേഹം ചൂണ്ടിക്കാട്ടി. ചില സമുദ്ര മേഖലകളിലെ നിയന്ത്രണങ്ങളും ഗതാഗത-കടൽ പാതകളിലെ തടസ്സങ്ങളും വിപണിയിലെത്തുന്ന മത്സ്യത്തിന്റെ അളവിനെ ബാധിച്ചു.
മത്സ്യത്തിന്റെ വില പ്രധാനമായും വിതരണവും ആവശ്യവും അനുസരിച്ചാണ് മാറുന്നതെന്നും, മത്സ്യബന്ധനവും മറ്റ് പ്രവർത്തനച്ചെലവുകളും കണക്കിലെടുക്കുമ്പോൾ കൃത്രിമമായി കുറഞ്ഞ വില നിശ്ചയിക്കുന്നത് പ്രായോഗികമല്ലെന്നും അദ്ദേഹം പറഞ്ഞു.
