വയനാട്:വയനാട് ലോക്സഭാ തിരഞ്ഞെടുപ്പിൽ പ്രിയങ്ക ഗാന്ധിയുടെ വിജയം ചോദ്യം ചെയ്തുകൊണ്ട് എൻഡിഎ സ്ഥാനാര്‍ഥി നവ്യ ഹരിദാസ് നൽകിയ ഹർജിയിൽ കേരള ഹൈക്കോടതി പ്രിയങ്ക ഗാന്ധിക്ക് നോട്ടീസ് ഇറക്കി.
തിരഞ്ഞെടുപ്പ് സമയത്ത് സമർപ്പിച്ച സ്വത്ത് വിവരശേഖരത്തിൽ യഥാർത്ഥ വിവരങ്ങൾ മറച്ചുവെച്ചതായി ആരോപിച്ചാണ് ഹർജി നൽകിയിരിക്കുന്നത്. ഹൈക്കോടതി ഈ ഹർജി സ്വീകരിച്ചുകൊണ്ട് പ്രിയങ്ക ഗാന്ധിക്ക് രണ്ട് മാസത്തിനുള്ളിൽ മറുപടി നൽകാൻ നിർദേശം നൽകി.
വയനാട് ലോക്സഭാ മണ്ഡലത്തിൽ 6,22,338 വോട്ടുകൾ നേടി പ്രിയങ്ക ഗാന്ധി ആദ്യമായി തിരഞ്ഞെടുപ്പ് ജയിച്ചിരുന്നു. 1,09,939 വോട്ടുകൾ മാത്രം നേടിയ നവ്യ ഹരിദാസ് മൂന്നാം സ്ഥാനത്താണ് എത്തിയത്. ഈ തിരഞ്ഞെടുപ്പ് ഫലം റദ്ദാക്കണമെന്ന് നേരത്തെ തിരഞ്ഞെടുപ്പ് കമ്മീഷനെ സമീപിച്ചിരുന്ന നവ്യ ഹരിദാസ് ഇപ്പോൾ ഹൈക്കോടതിയിലേക്ക് തിരിഞ്ഞു. പ്രിയങ്കയുടെ വിജയത്തിന് പിന്നാലെ ബിജെപി നേതൃത്വം ഗുരുതരമായ ആരോപണങ്ങളുമായി രംഗത്തെത്തിയിരുന്നു.
