കുവൈറ്റ് സിറ്റി : കുവൈത്ത് മുനിസിപ്പാലിറ്റി ജഹ്റ ഗവർണറേറ്റിൽ അനധികൃത തെരുവ് കച്ചവടത്തിനെതിരായ പരിശോധന ശക്തമാക്കി. ഏറ്റവും പുതിയ പരിശോധനയിൽ ഏഴ് മൊബൈൽ കച്ചവടവണ്ടികൾ (മൊബൈൽ കാർട്ടുകൾ) നീക്കം ചെയ്യുകയും രണ്ട് നിയമലംഘന നോട്ടീസുകൾ നൽകുകയും ചെയ്തു.
ജഹ്റ മുനിസിപ്പാലിറ്റി ശാഖയിലെ പബ്ലിക് ഹൈജീൻ ആൻഡ് റോഡ് ഒക്യുപൻസി വകുപ്പ് നടത്തിയ പരിശോധന, അനധികൃത തെരുവ് വ്യാപാരം തടയുന്നതിനും പൊതുസ്ഥലങ്ങളിലെ ക്രമസമാധാനം ഉറപ്പാക്കുന്നതിനുമുള്ള തുടർനടപടികളുടെ ഭാഗമായിരുന്നു.
ജഹ്റ ഗവർണറേറ്റിലെ പബ്ലിക് ഹൈജീൻ ആൻഡ് റോഡ് ഒക്യുപൻസി വകുപ്പ് ഡയറക്ടർ നവാഫ് അൽ-മുതൈരി പറഞ്ഞു, പ്രദേശത്ത് അനധികൃത തെരുവ് കച്ചവടക്കാരുടെ സാന്നിധ്യം കണ്ടെത്തിയതിനെ തുടർന്നാണ് പരിശോധന ആരംഭിച്ചതെന്ന്. നിയമലംഘനങ്ങൾ പൂർണമായി ഇല്ലാതാക്കാനും റോഡരികിലെ അനധികൃത വ്യാപാരം തടയാനുമായി ഗവർണറേറ്റിലുടനീളം പരിശോധനകൾ തുടരുമെന്നും അദ്ദേഹം വ്യക്തമാക്കി.
ജഹ്റയിലെ എല്ലാ മേഖലകളിലും തെരുവ് കച്ചവടക്കാരെ ലക്ഷ്യമിട്ടുള്ള ഫീൽഡ് പരിശോധനകൾ കൂടുതൽ ശക്തമാക്കിയിട്ടുണ്ടെന്നും, പൊതുശുചിത്വം സംരക്ഷിക്കാനും റോഡുകളും പൊതുസ്ഥലങ്ങളും അനധികൃതമായി കൈയേറുന്നത് തടയാനും നിലവിലെ നിയമങ്ങൾ കർശനമായി നടപ്പാക്കുന്നത് തുടരുമെന്നും മുനിസിപ്പാലിറ്റിയുടെ പബ്ലിക് റിലേഷൻസ് വകുപ്പ് അറിയിച്ചു.
