കുവൈറ്റ് സിറ്റി : കുവൈത്തിലെ നീതിന്യായ മന്ത്രാലയവും പബ്ലിക് അതോറിറ്റി ഫോർ സിവിൽ ഇൻഫർമേഷനും പൗരന്മാരോടും താമസക്കാരോടും അംഗീകൃത ഇലക്ട്രോണിക് സിഗ്നേച്ചർ സജീവമാക്കി കൂടുതൽ സർക്കാർ, ബാങ്കിംഗ് സേവനങ്ങൾ പ്രയോജനപ്പെടുത്തണമെന്ന് അഭ്യർഥിച്ചു.
ഇലക്ട്രോണിക് സിഗ്നേച്ചർ ഉപയോഗിച്ച് രേഖകളും ഇടപാടുകളും കടലാസ് രേഖകളോ ഓഫീസുകളിൽ നേരിട്ട് പോകേണ്ടതോ ഇല്ലാതെ ഡിജിറ്റലായി സ്ഥിരീകരിക്കാനാകും. കുവൈത്തിലെ നിലവിലുള്ള നിയമങ്ങൾ പ്രകാരം ഇതിന് പൂർണ നിയമസാധുതയും ഉണ്ടായിരിക്കുമെന്ന് അധികൃതർ വ്യക്തമാക്കി.
ഇലക്ട്രോണിക് നോട്ടറൈസേഷൻ, പവർ ഓഫ് അറ്റോർണി നൽകൽ, റദ്ദാക്കൽ, കമ്പനി, സ്ഥാപന രജിസ്ട്രേഷൻ, വാണിജ്യ ലൈസൻസിംഗ് നടപടിക്രമങ്ങൾ, തിരഞ്ഞെടുത്ത ബാങ്കിംഗ് കരാറുകൾ എന്നിവയുൾപ്പെടെ നിരവധി ഡിജിറ്റൽ ഇടപാടുകളെ ഈ സേവനം ക്രമേണ പിന്തുണയ്ക്കും.
“മൈ ഐഡന്റിറ്റി” ആപ്ലിക്കേഷൻ വഴിയോ സെൽഫ് സർവീസ് കിയോസ്ക്കുകൾ വഴിയോ പൗരന്മാർക്ക് അവരുടെ ഇലക്ട്രോണിക് സിഗ്നേച്ചർ സജീവമാക്കാം. അതേസമയം കുവൈറ്റിലെ വിവിധ സ്ഥലങ്ങളിൽ ലഭ്യമായ നിയുക്ത കിയോസ്ക്കുകൾ വഴി താമസക്കാർക്ക് ആക്ടിവേഷൻ പൂർത്തിയാക്കാം.
നിലവിലുള്ളതും ഭാവിയിൽ ലഭ്യമാകുന്നതുമായ സർക്കാർ, സാമ്പത്തിക ഡിജിറ്റൽ സേവനങ്ങൾ കൂടുതൽ വേഗത്തിലും സുരക്ഷിതമായും എളുപ്പത്തിലും ലഭ്യമാക്കുന്നതിനായി എല്ലാവരും ഇലക്ട്രോണിക് സിഗ്നേച്ചർ സജീവമാക്കണമെന്ന് ഇരു അധികൃതരും അഭ്യർഥിച്ചു.
