കുവൈത്ത് സിറ്റി: അൽ റിഹാബ് മേഖലയിലെ താമസവീട്ടിൽ പ്രവർത്തിച്ചിരുന്ന അനധികൃത മദ്യനിർമാണ കേന്ദ്രം ആഭ്യന്തര മന്ത്രാലയം തകർത്തു. പ്രാദേശികമായി മദ്യം നിർമ്മിച്ച് വിതരണം ചെയ്യുന്ന സംഘത്തെയാണ് അധികൃതർ കണ്ടെത്തിയത്.
ക്രിമിനൽ ഇൻവെസ്റ്റിഗേഷൻ ജനറൽ ഡിപ്പാർട്ട്‌മെന്റിന്റെ നേതൃത്വത്തിൽ നടത്തിയ വിശദമായ അന്വേഷണത്തിനും നിരീക്ഷണത്തിനും പിന്നാലെയാണ് മൂന്നുനില വീട്ടിൽ പരിശോധന നടത്തിയത്. പരിശോധനയിൽ 25 ലിറ്റർ വീതം ശേഷിയുള്ള ഏകദേശം 300 കണ്ടെയ്‌നറുകളിൽ മദ്യപദാർഥങ്ങൾ കണ്ടെത്തി. ആകെ 7,500 ലിറ്ററോളം ശേഷിയുള്ള കണ്ടെയ്‌നറുകളാണ് പിടിച്ചെടുത്തത്.
വീടിന്റെ മുഴുവൻ ഭാഗവും മദ്യനിർമാണത്തിനായി ഉപയോഗിച്ചിരുന്നതായാണ് അന്വേഷണത്തിൽ വ്യക്തമായത്. സമീപത്തെ വീടുകൾക്ക് അപകടമുണ്ടാക്കാവുന്ന തീപിടിത്തസാധ്യതയുള്ള വസ്തുക്കളും സ്ഥലത്തുനിന്ന് കണ്ടെത്തി.
അപകടസാധ്യതയുള്ള വസ്തുക്കൾ കൈകാര്യം ചെയ്യുന്നതിനും പ്രദേശം സുരക്ഷിതമാക്കുന്നതിനുമായി ജനറൽ ഫയർ ഫോഴ്‌സിനെ വിളിച്ചുവരുത്തി.
നിയമലംഘനങ്ങൾ നീക്കം ചെയ്യുന്നതിനുള്ള നടപടികളുടെ ഭാഗമായി വൈദ്യുതി, ജലം, പുനരുപയോഗ ഊർജ മന്ത്രാലയം വൈദ്യുതി ബന്ധം വിച്ഛേദിച്ചു. പിടിച്ചെടുത്ത വസ്തുക്കൾ നശിപ്പിക്കുന്നതിനും ആവശ്യമായ നിയമനടപടികൾ സ്വീകരിക്കുന്നതിനും കുവൈത്ത് മുനിസിപ്പാലിറ്റിയെ ചുമതലപ്പെടുത്തി.
സംഭവവുമായി ബന്ധപ്പെട്ട പ്രതികൾക്കെതിരെ നിയമനടപടികൾ ആരംഭിച്ചതായും ഇവരെ ബന്ധപ്പെട്ട അധികാരികൾക്ക് കൈമാറിയതായും അധികൃതർ അറിയിച്ചു.
കുറ്റകൃത്യങ്ങൾക്കായി ഉപയോഗിക്കുന്ന കേന്ദ്രങ്ങൾ നിരീക്ഷിക്കുന്നതും പ്രതികളെ പിടികൂടുന്നതും പൊതുജനങ്ങളുടെ സുരക്ഷ ഉറപ്പാക്കുന്നതിനുള്ള നിയമനടപടികൾ ശക്തമായി തുടരുന്നതുമാണ് ആഭ്യന്തര മന്ത്രാലയത്തിന്റെ ലക്ഷ്യമെന്നും അധികൃതർ വ്യക്തമാക്കി.
