കുവൈത്ത് സിറ്റി: ശാസ്ത്രസാങ്കേതിക രംഗത്തെ നൂതന ആശയങ്ങളും വിദ്യാർഥികളുടെ സർഗാത്മക കഴിവുകളും അവതരിപ്പിച്ച് ഇന്ത്യൻ സ്കൂൾ ഓഫ് എക്സലൻസിൽ റോബോട്ടിക്സ്, ജ്യോതിശാസ്ത്ര പ്രദർശനം സംഘടിപ്പിച്ചു. ഒക്ടോബർ 22ന് നടന്ന ‘റോബോഎക്സലൻസ്’, ‘ആസ്ട്രോഎക്സലൻസ്’ പ്രദർശനങ്ങളിൽ റോബോട്ടിക്സ്, നിർമിതബുദ്ധി (എഐ), ബഹിരാകാശ പര്യവേക്ഷണം തുടങ്ങിയ മേഖലകളിലെ വിദ്യാർഥികളുടെ പ്രോജക്ടുകൾ ശ്രദ്ധേയമായി.
ഇന്ത്യൻ സ്കൂൾ ഓഫ് എക്സലൻസ് ഡയറക്ടർ ഡോ. ഷെർലി ഡെന്നിസ് പ്രദർശനം ഉദ്ഘാടനം ചെയ്തു. നൂതന പഠനരീതികൾക്കും ശാസ്ത്രീയ അന്വേഷണങ്ങൾക്കും വിദ്യാർഥികളെ പ്രോത്സാഹിപ്പിക്കുന്നതിന്റെ ഭാഗമായാണ് പരിപാടി സംഘടിപ്പിച്ചത്.
റോബോട്ടിക്സ്, നിർമിതബുദ്ധി എന്നിവയുടെ സാധ്യതകൾ പ്രയോജനപ്പെടുത്തി വിദ്യാർഥികൾ തയ്യാറാക്കിയ വിവിധ പ്രോജക്ടുകൾ ‘റോബോഎക്സലൻസ്’ വിഭാഗത്തിൽ അവതരിപ്പിച്ചു. സ്മാർട്ട് കൃഷി, മാലിന്യ സംസ്കരണം, പുനരുപയോഗ ഊർജം, ജലസംരക്ഷണം, സ്മാർട്ട് സിറ്റി സംവിധാനങ്ങൾ തുടങ്ങിയ വിഷയങ്ങളെ അടിസ്ഥാനമാക്കിയുള്ള മാതൃകകൾ ശ്രദ്ധ നേടി. സുസ്ഥിര വികസന ലക്ഷ്യങ്ങൾ കൈവരിക്കുന്നതിൽ ശാസ്ത്രസാങ്കേതിക വിദ്യകൾക്കുള്ള പങ്കും പ്രോജക്ടുകളിലൂടെ വിദ്യാർഥികൾ വിശദീകരിച്ചു.
പ്രപഞ്ചത്തെയും ബഹിരാകാശത്തെയും അടുത്തറിയാനുള്ള അവസരമാണ് ‘ആസ്ട്രോഎക്സലൻസ്’ ഒരുക്കിയത്. സ്കൂളിലെ ആസ്ട്രോണമി ക്ലബ് അംഗങ്ങൾ ബഹിരാകാശ പര്യവേക്ഷണം, പ്രപഞ്ചത്തിലെ വിസ്മയങ്ങൾ, ജ്യോതിശാസ്ത്രത്തിലെ വിവിധ ആശയങ്ങൾ എന്നിവയെക്കുറിച്ചുള്ള പ്രദർശനങ്ങളും അവതരണങ്ങളും നടത്തി. വിദ്യാർഥികളിൽ ശാസ്ത്രീയ ചിന്തയും അന്വേഷണത്വരയും വളർത്താൻ പരിപാടി സഹായകമായി.
രക്ഷാകർതൃ-അധ്യാപക സംഗമത്തോടനുബന്ധിച്ചാണ് പ്രദർശനം സംഘടിപ്പിച്ചത്. വിദ്യാർഥികളുടെ പ്രായോഗിക പരിജ്ഞാനവും നൂതന ആശയങ്ങളും നേരിട്ട് വിലയിരുത്താൻ രക്ഷിതാക്കൾക്ക് അവസരം ലഭിച്ചു. വിദ്യാർഥികളുടെയും അധ്യാപകരുടെയും പരിശ്രമങ്ങളെ രക്ഷിതാക്കൾ അഭിനന്ദിച്ചു. അനുഭവാധിഷ്ഠിത പഠനത്തിനും ശാസ്ത്രീയ അന്വേഷണങ്ങൾക്കും അവസരമൊരുക്കുന്ന സ്കൂൾ മാനേജ്‌മെന്റിന്റെ പിന്തുണയെയും അവർ പ്രശംസിച്ചു.
വിദ്യാർഥികളിലെ നൂതന ആശയങ്ങളും ശാസ്ത്രാഭിരുചിയും പ്രായോഗിക കഴിവുകളും പ്രോത്സാഹിപ്പിക്കുന്നതിൽ പ്രദർശനം ശ്രദ്ധേയമായി. റോബോട്ടിക്സ്, ആസ്ട്രോണമി ക്ലബ് അംഗങ്ങളെയും അധ്യാപകരെയും സ്കൂൾ അധികൃതർ അഭിനന്ദിച്ചു.
