കുവൈത്ത് : ജോയാലുക്കാസ് എക്സ്ചേഞ്ചും സ്പീഡ് സ്പോർട്സ് അക്കാദമിയും സംയുക്തമായി 15 വയസ്സിന് താഴെയുള്ള കുട്ടികൾക്കായി ജൂലൈ 24-ന് ആവേശകരമായ പെനാൽറ്റി ഷൂട്ടൗട്ട് മത്സരം സംഘടിപ്പിച്ചു.
സാധാരണ മുതിർന്നവർക്കായി മാത്രം സംഘടിപ്പിക്കാറുള്ള പെനാൽറ്റി ഷൂട്ടൗട്ട് കുട്ടികൾക്കായി ഒരുക്കിയത് വേറിട്ട അനുഭവമായിരുന്നുവെന്ന് പരിപാടിയിൽ പങ്കെടുത്ത മാതാപിതാക്കളും കായികപ്രേമികളും അഭിപ്രായപ്പെട്ടു. ഇത്തരത്തിലുള്ള പരിപാടികൾ കുട്ടികളിലെ കായികപ്രതിഭ വളർത്തുന്നതിനും ശാരീരികക്ഷമത പ്രോത്സാഹിപ്പിക്കുന്നതിനും വലിയ പങ്കുവഹിക്കുമെന്നും അവർ പറഞ്ഞു.
30-ലധികം ടീമുകളിൽ നിന്നായി 100-ലധികം കുട്ടികൾ മത്സരത്തിൽ പങ്കെടുത്തു. യുവതാരങ്ങളെ പ്രോത്സാഹിപ്പിക്കാൻ നിരവധി കായികപ്രേമികളും രക്ഷിതാക്കളും വൻതോതിൽ എത്തിച്ചേർന്നു.
ജോയാലുക്കാസ് എക്സ്ചേഞ്ച് അസിസ്റ്റന്റ് ജനറൽ മാനേജർ അബ്ദുൽ അസീസ് മട്ടുവയിൽ സ്വാഗതപ്രസംഗത്തോടെ പരിപാടി ഉദ്ഘാടനം ചെയ്തു. ജോയാലുക്കാസ് എക്സ്ചേഞ്ചിന്റെ മാർക്കറ്റിംഗ് മാനേജർ നിതിൻ ജോർജ്, അസിസ്റ്റന്റ് മാർക്കറ്റിംഗ് മാനേജർ വിനീഷ് വേളായുധൻ, പ്രശാന്ത്, ജോബിൻ എന്നിവരും സ്പീഡ് സ്പോർട്സ് അക്കാദമിയുടെ പ്രതിനിധികളായ അശ്വന്ത്, സുമേഷ് എന്നിവരും ചേർന്നാണ് പരിപാടിക്ക് നേതൃത്വം നൽകിയത്.
ആവേശകരമായ ഫൈനൽ മത്സരങ്ങൾക്ക് ശേഷം വിജയികൾക്ക് ജോയാലുക്കാസ് എക്സ്ചേഞ്ച് പ്രതിനിധികൾ ട്രോഫികളും സമ്മാനങ്ങളും വിതരണം ചെയ്തു. വരും ദിവസങ്ങളിലും കുട്ടികൾക്കും കായികപ്രേമികൾക്കുമായി കൂടുതൽ വൈവിധ്യമാർന്ന സാമൂഹിക-കായിക പരിപാടികൾ സംഘടിപ്പിക്കുമെന്ന് ജോയാലുക്കാസ് എക്സ്ചേഞ്ച് മാനേജ്മെന്റ് അറിയിച്ചു.
