കൊച്ചി:കൊച്ചി തീരത്ത് സംഭവിച്ച കപ്പലപകടത്തിനെതിരെ പോലീസ് കേസ് രജിസ്റ്റർ ചെയ്തു. മേയ് 24-ന് കൊച്ചി തീരത്ത് നിന്ന് 38 നോട്ടിക്കൽ മൈൽ അകലെ ലൈബീരിയൻ ചരക്കുകപ്പലായ എം.എസ്.സി എൽഎസ്-3 ചരക്കുകപ്പലിന് സംഭവിച്ച അപകടത്തിനെതിരെ ഫോർട്ട് കൊച്ചി തീരദേശ പോലീസാണ് കേസ് എടുത്തിരിക്കുന്നത്.
കപ്പലുടമയായ എംഎസ്സി എൽസ 3 എന്ന കമ്പനിയെ ഒന്നാം പ്രതി ചേർത്താണ് കേസെടുത്തത്. ഷിപ്പ് മാസ്റ്ററാണ് രണ്ടാം പ്രതി. ക്രൂ അംഗങ്ങൾ മൂന്നാം പ്രതിയുമാണ്. സി. ഷാംജി എന്നയാളുടെ പരാതിയെ തുടർന്നാണ് ഈ കേസ് രജിസ്റ്റർ ചെയ്തിരിക്കുന്നത്. ബിഎൻഎസ് 282, 285, 286, 287, 288, 3(5) തുടങ്ങിയ വകുപ്പുകൾ പ്രകാരമാണ് കേസ് എടുത്തിരിക്കുന്നത്.
പ്രാഥമിക അന്വേഷണ റിപ്പോർട്ടിൽ (FIR) സൂചിപ്പിച്ചിരിക്കുന്നതനുസരിച്ച്, എളുപ്പത്തിൽ തീപിടിക്കാൻ സാധ്യതയുള്ള ചരക്കുകൾ കപ്പലിൽ ഉണ്ടായിരുന്നിട്ടും, മനുഷ്യജീവനും സ്വത്തിനും അപകടം ഉണ്ടാക്കുന്ന രീതിയിൽ അശ്രദ്ധമായി കപ്പൽ നിയന്ത്രിച്ചതാണ് അപകടത്തിന് കാരണമായതെന്ന് വ്യക്തമാക്കിയിട്ടുണ്ട്. കപ്പലിലെ കണ്ടെയ്നറുകൾ കടലിൽ വീണതോടെ അതിലുണ്ടായിരുന്ന വസ്തുക്കൾ പുറത്തുപോയി പരിസ്ഥിതിക്ക് ഗുരുതരമായ ദോഷം വരുത്തിയെന്നും, ഈ സംഭവം മത്സ്യബന്ധനത്തിനും മത്സ്യത്തൊഴിലാളികളുടെ ജീവിതത്തിനും ദുഷ്പ്രഭാവം ചെലുത്തിയെന്നും റിപ്പോർട്ടിൽ പറയുന്നു. കടലിൽ വീണ കണ്ടെയ്നറുകൾ മറ്റ് കപ്പലുകളുടെയും ജലയാനങ്ങളുടെയും ഗതാഗതത്തിന് തടസ്സമായി ഭവിച്ചിട്ടുണ്ടെന്നും റിപ്പോർട്ടിൽ ചൂണ്ടിക്കാണിച്ചിരിക്കുന്നു.
ആദ്യം തുറമുഖ വകുപ്പ് മന്ത്രിയടക്കമുള്ളവർ ഈ അപകടത്തിൽ കേസെടുക്കില്ലെന്ന് വ്യക്തമാക്കിയിരുന്നു. എന്നാൽ പിന്നീടാണ് ഫോർട്ട് കൊച്ചി തീരദേശ പോലീസ് കേസ് രജിസ്റ്റർ ചെയ്തത്.
