കുവൈത്ത് സിറ്റി: ഇന്ത്യയും കുവൈത്തും തമ്മിൽ വിമാന സർവീസുകൾ വേഗത്തിൽ പുനരാരംഭിക്കുന്നതിനുള്ള സാധ്യതകൾ ചർച്ച ചെയ്തു. മേയ് 4-ന് നടന്ന വിർച്വൽ യോഗത്തിൽ ഇന്ത്യയുടെ സിവിൽ ഏവിയേഷൻ സെക്രട്ടറി സമീർ കുമാർ സിന്ഹയും കുവൈത്തിലെ ഡിജിസിഎ പ്രസിഡന്റ് ഷെയ്ഖ് ഹുമൂദ് മുബാറക് അൽ-സബാഹും പങ്കെടുത്തു.
ഇരു രാജ്യങ്ങളുടെയും സഹകരണം കൂടുതൽ ശക്തമാക്കുന്നതിനും കുവൈത്തിൽ നിന്ന് ഇന്ത്യൻ വിമാന കമ്പനികളുടെ സർവീസുകൾ പുനരാരംഭിക്കാനുള്ള നടപടികൾ വേഗത്തിലാക്കുന്നതിനുമാണ് ചർച്ച കേന്ദ്രീകരിച്ചത്. കുവൈത്തിൽ താമസിക്കുന്ന ഇന്ത്യൻ പ്രവാസി സമൂഹത്തിന് കൂടുതൽ സൗകര്യം ഉറപ്പാക്കുന്നതും വ്യോമഗതാഗതം
മെച്ചപ്പെടുത്തുന്നതുമാണ് ലക്ഷ്യമെന്ന് അധികൃതർ അറിയിച്ചു.
യാത്രാ സൗകര്യങ്ങൾ മെച്ചപ്പെടുത്താനും ഇരുരാജ്യ ബന്ധം ശക്തിപ്പെടുത്താനും കൂടുതൽ സഹകരണം ഉണ്ടാകുമെന്ന് ഇരുവിഭാഗവും പ്രതീക്ഷ പ്രകടിപ്പിച്ചു.
