കുവൈത്ത് സിറ്റി : ഹൈസ്കൂൾ വിദ്യാർത്ഥികളിൽ പൊതുവേദിയിലെ സംസാരിക്കാനുള്ള കഴിവ് (Public Speaking Skills) വളർത്താനും, ആത്മവിശ്വാസത്തോടെ ആശയങ്ങൾ അവതരിപ്പിക്കാനും സഹായിക്കുന്നതിനായി പ്രോഗ്രസീവ് പ്രൊഫഷണൽ ഫോറം (PPF Kuwait), പിപിഎഫ് കെയർ (PPF Care) സീരീസിന്റെ ഭാഗമായി സംഘടിപ്പിച്ച “Speak to Spark” വർക്ക്ഷോപ്പ് ഏറെ ശ്രദ്ധേയമായി.
ഫഹാഹീൽ കോഹിനൂർ ഓഡിറ്റോറിയത്തിൽ നടന്ന പരിപാടിക്ക് പ്രമുഖ കോർപ്പറേറ്റ് പരിശീലകയായ ബിന്ദു ജോൺ നേതൃത്വം നൽകി. വിദ്യാർത്ഥികൾക്ക് വെറുമൊരു ക്ലാസ് എന്നതിലുപരി, സ്വന്തം ആശയങ്ങൾ പങ്കുവെക്കാനും സ്വയം അവതരിപ്പിക്കാനും അവസരം നൽകുന്ന തികച്ചും സംവേദനാത്മകമായ (interactive) ഒന്നായിരുന്നു ഈ സെഷൻ. കുട്ടികളുടെ ആവേശകരമായ പങ്കാളിത്തം വർക്ക്ഷോപ്പിനെ കൂടുതൽ സജീവമാക്കി.
PPF കുവൈത്ത് ജനറൽ സെക്രട്ടറി ബിപിൻ പുനത്തിൽ ചടങ്ങിലേക്ക് ഏവരെയും സ്വാഗതം ചെയ്തു. പ്രസിഡന്റ് അനിൽ കുമാർ ആശംസകൾ നേർന്നു സംസാരിച്ചു.
പുതുതലമുറയിൽ ആശയവിനിമയ ശേഷിയും (communication skills) നേതൃപാടവവും വളർത്തുക എന്ന ലക്ഷ്യത്തോടെ PPF നടപ്പിലാക്കുന്ന വിവിധ പദ്ധതികളുടെ ഭാഗമായാണ് “Speak to Spark” സംഘടിപ്പിച്ചത്. പരിപാടിയുടെ പ്ലാനിങ് മുതൽ നടത്തിപ്പ് വരെയുള്ള കാര്യങ്ങളിൽ PPF എക്സിക്യൂട്ടീവ് അംഗങ്ങളും വോളണ്ടിയർമാരും കാഴ്ചവെച്ച മികച്ച ടീം വർക്കും പ്രൊഫഷണലിസവുമാണ് ഈ വിജയത്തിന് പിന്നിൽ.
വേദിയിലെ പേടിയകറ്റി സ്വന്തം ആശയങ്ങൾ ധൈര്യത്തോടെ പൊതുവേദിയിൽ അവതരിപ്പിക്കാൻ കുട്ടികളെ പ്രാപ്തരാക്കി എന്നതാണ് ഈ പരിശീലന പരിപാടിയുടെ ഏറ്റവും വലിയ വിജയം. വിദ്യാർത്ഥികളുടെ ഭാഗത്തുനിന്നും അത്യധികം ആവേശകരമായ പ്രതികരണമാണ് ലഭിച്ചത്. പരിപാടിയുടെ കൺവീനർ ഷാജി മഠത്തിൽ ചടങ്ങിന് നന്ദി രേഖപ്പെടുത്തി.
യുവാക്കളുടെ ഒളിഞ്ഞിരിക്കുന്ന കഴിവുകൾ കണ്ടെത്തി അവരെ ആത്മവിശ്വാസമുള്ള പ്രഭാഷകരും ഭാവിയിലെ മികച്ച നേതാക്കളുമായി വാർത്തെടുക്കാനുള്ള PPF-ന്റെ പ്രവർത്തനങ്ങൾക്ക് “Speak to Spark” ഒരു പുതിയ തുടക്കമായിരിക്കുകയാണ്.
