കുവൈത്ത് സിറ്റി : ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (ഐബിപിസി) കുവൈത്തിന്റെ പുതുതായി തിരഞ്ഞെടുക്കപ്പെട്ട എക്സിക്യൂട്ടീവ് കമ്മിറ്റി അംഗങ്ങൾ കുവൈത്തിലെ ഇന്ത്യൻ അംബാസഡർ എച്ച്.ഇ. പരമിത ത്രിപാഠിയുമായി കൂടിക്കാഴ്ച നടത്തി. ഒക്ടോബർ 22-ന് ഇന്ത്യൻ എംബസിയിൽ നടന്ന സൗഹൃദ സന്ദർശനത്തിൽ ഇന്ത്യയും കുവൈത്തും തമ്മിലുള്ള വ്യാപാര, സാമ്പത്തിക, പ്രൊഫഷണൽ സഹകരണം കൂടുതൽ ശക്തിപ്പെടുത്തുന്നതിനുള്ള വിവിധ സാധ്യതകൾ ചർച്ച ചെയ്തു.
ഐബിപിസി ചെയർമാൻ ഗൗരവ് ഒബ്റോയ്, വൈസ് ചെയർമാൻ സുരേഷ് കെ. പി., സെക്രട്ടറി സുനിത് അറോറ, ജോയിന്റ് സെക്രട്ടറി കൃഷൻ സൂര്യകാന്ത്, ട്രഷറർ കാർത്തിക് രാമദാസ് എന്നിവർ കൂടിക്കാഴ്ചയിൽ പങ്കെടുത്തു.
ഇന്ത്യയും കുവൈത്തും തമ്മിലുള്ള ഉഭയകക്ഷി ബന്ധം കൂടുതൽ ഊഷ്മളമാക്കുന്നതിനൊപ്പം ഇരുരാജ്യങ്ങളിലെയും വ്യവസായ, വ്യാപാര മേഖലകളിൽ പുതിയ അവസരങ്ങൾ കണ്ടെത്തുന്നതിനും നിക്ഷേപ സാധ്യതകൾ പ്രോത്സാഹിപ്പിക്കുന്നതിനും ഐബിപിസിയുടെ പ്രവർത്തനങ്ങൾ കൂടുതൽ സജീവമാക്കുന്നതിനെക്കുറിച്ച് കൂടിക്കാഴ്ചയിൽ ആശയവിനിമയം നടന്നു.
ഇന്ത്യൻ എംബസിയുമായി അടുത്ത സഹകരണം തുടരുന്നതിനും ഇന്ത്യയിലെയും കുവൈത്തിലെയും ബിസിനസ് സമൂഹങ്ങൾക്കിടയിൽ കൂടുതൽ ഫലപ്രദമായ പങ്കാളിത്തവും പ്രൊഫഷണൽ ബന്ധങ്ങളും വളർത്തിയെടുക്കുന്നതിനും ഐബിപിസി പ്രതിജ്ഞാബദ്ധമാണെന്ന് പുതിയ എക്സിക്യൂട്ടീവ് കമ്മിറ്റി അറിയിച്ചു.
ഇന്ത്യ–കുവൈത്ത് വ്യാപാരബന്ധങ്ങൾക്ക് കൂടുതൽ കരുത്തേകുന്ന പ്രവർത്തനങ്ങൾക്കും പുതിയ സംരംഭങ്ങൾക്കും മുൻഗണന നൽകുന്നതിന്റെ ഭാഗമായി നടന്ന കൂടിക്കാഴ്ച ഏറെ ക്രിയാത്മകവും ഫലപ്രദവുമായിരുന്നുവെന്ന് കമ്മിറ്റി വിലയിരുത്തി.
