കുവൈത്ത് സിറ്റി: കുവൈത്തിലെ തെക്കൻ ജാബർ മറൈൻ റിസർവുകളിൽ സ്ഥിതി ചെയ്യുന്ന കൃത്രിമ റീഫ് കോളനികളിൽ പവിഴപ്പുറ്റുകളിലും സമുദ്ര ജൈവവൈവിധ്യത്തിലും ഗണ്യമായ വളർച്ചയുണ്ടായതായി എൻവയോൺമെന്റൽ വോളണ്ടറി ഫൗണ്ടേഷനുമായി അഫിലിയേറ്റ് ചെയ്തിട്ടുള്ള കുവൈറ്റ് ഡൈവിംഗ് സംഘം പ്രഖ്യാപിച്ചു. കുവൈറ്റിലെ പവിഴപ്പുറ്റുകളുടെ ആവാസവ്യവസ്ഥയെ സംരക്ഷിക്കുന്നതിനും പുനഃസ്ഥാപിക്കുന്നതിനും ലക്ഷ്യമിട്ടുള്ള 30 വർഷത്തിലേറെ നീണ്ട സന്നദ്ധ പരിസ്ഥിതി പ്രവർത്തനങ്ങളെ പ്രതിനിധീകരിക്കുന്ന വിശാലമായ കൃത്രിമ സമുദ്ര കരുതൽ സംരംഭത്തിന്റെ ഭാഗമാണ് ഈ പദ്ധതിയെന്ന് ടീമിന്റെ പരിസ്ഥിതി പദ്ധതി മാനേജർ മഹ്മൂദ് അഷ്കനാനി പറഞ്ഞു.
കൃത്രിമ പവിഴപ്പുറ്റുകൾ പ്രകൃതിദത്ത സമുദ്ര ആവാസവ്യവസ്ഥയോട് സാമ്യമുള്ള അന്തരീക്ഷം സൃഷ്ടിച്ചതോടെ പവിഴങ്ങളും സ്പോഞ്ചുകളും വ്യാപകമായി വളരുകയും കക്കയിറച്ചി, മുത്തുച്ചിപ്പി, എക്കിനോഡെർമുകൾ, ആൽഗകൾ, വിവിധ ഇനം മത്സ്യങ്ങൾ എന്നിവയുൾപ്പെടെ ആയിരക്കണക്കിന് സമുദ്രജീവികൾ ഇവിടെ ആവാസമുറപ്പിക്കുകയും ചെയ്തതായി അദ്ദേഹം പറഞ്ഞു.
പദ്ധതിക്ക് പിന്തുണ നൽകിയ എൻവയോൺമെന്റ് പബ്ലിക് അതോറിറ്റി, കുവൈത്ത് ഓയിൽ കമ്പനി, മീന അൽ-അഹ്മദി, കുവൈത്ത് നാഷണൽ പെട്രോളിയം കമ്പനി എന്നിവരെ അദ്ദേഹം അഭിനന്ദിച്ചു. പവിഴപ്പുറ്റുകൾക്ക് സമീപം മത്സ്യബന്ധന വലകളും ഉപകരണങ്ങളും ഉപേക്ഷിക്കരുതെന്ന് പൊതുജനങ്ങളോടും അദ്ദേഹം അഭ്യർത്ഥിച്ചു.
