കുവൈത്ത് സിറ്റി: റോഡ് സുരക്ഷയും ഗതാഗത നിയമപാലനവും ശക്തമാക്കുന്നതിന്റെ ഭാഗമായി ജനറൽ ട്രാഫിക് ഡിപ്പാർട്ട്മെന്റ് നടത്തിയ പരിശോധനയിൽ 24 മണിക്കൂറിനിടെ 3,615 നേരിട്ടുള്ള ട്രാഫിക് നിയമലംഘനങ്ങൾ കണ്ടെത്തി.
ആഭ്യന്തര മന്ത്രാലയം പുറത്തുവിട്ട കണക്കുകൾ പ്രകാരം, ട്രക്കുകളുമായി ബന്ധപ്പെട്ട 296 നിയമലംഘനങ്ങൾ രേഖപ്പെടുത്തി. ലെയ്ൻ മാറുമ്പോൾ ഇൻഡിക്കേറ്റർ ഉപയോഗിക്കാത്തതിന് 179 പേർക്ക് പിഴ ചുമത്തി. വാഹനമോടിക്കുന്നതിനിടെ മൊബൈൽ ഫോൺ ഉപയോഗിച്ചതിന് 154 നിയമലംഘനങ്ങളും, റഡാർ പരിശോധനയിൽ അമിതവേഗത്തിന് 82 കേസുകളും കണ്ടെത്തി.
സീറ്റ് ബെൽറ്റ് ധരിക്കാത്തതിന് 68, അനധികൃത വിൻഡോ ടിന്റിങ്ങിന് 46, തെറ്റായ ടോവിംഗുമായി ബന്ധപ്പെട്ട ഒമ്പത് നിയമലംഘനങ്ങളും അധികൃതർ രേഖപ്പെടുത്തി. വാഹനത്തിൽ ലൈസൻസ് പ്ലേറ്റ് സ്ഥാപിക്കാത്തതിന് ഒരു കേസും കണ്ടെത്തി.
ഇതിന് പുറമെ 837 മറ്റ് ട്രാഫിക് നിയമലംഘനങ്ങളും രേഖപ്പെടുത്തി. 19 വാഹനങ്ങൾ കസ്റ്റഡിയിലെടുത്തു. താമസനിയമങ്ങൾ ലംഘിച്ച 12 പേരെ പിടികൂടുകയും 26 പേർക്ക് മാനുഷിക സഹായം നൽകുകയും ചെയ്തു.
അൽ-അമീരി, അൽ-സബാഹ് ആശുപത്രികളിൽ ട്രാഫിക് ഉദ്യോഗസ്ഥർ 55 നിയമലംഘനങ്ങൾ കണ്ടെത്തി. വിവിധ കേസുകളിലായി അറസ്റ്റ്, സമൻസ്, കോടതി വിധികളുടെ നിർവഹണം, താമസനിയമ ലംഘനം എന്നിവയ്ക്കായി 15 പേരെ ബന്ധപ്പെട്ട അധികാരികൾക്ക് കൈമാറി.
മറ്റുള്ളവർക്ക് അപകടം സൃഷ്ടിക്കാൻ സാധ്യതയുള്ള അശ്രദ്ധയുമായി ബന്ധപ്പെട്ട് നാല് കുവൈത്തികളെയും പൊലീസ് സ്റ്റേഷനുകളിലേക്ക് മാറ്റി. കോടതി ഉത്തരവുപ്രകാരം കസ്റ്റഡിയിലെടുക്കേണ്ട നാല് വാഹനങ്ങളും പിടിച്ചെടുത്തു.
റോഡ് സുരക്ഷ ഉറപ്പാക്കുന്നതിനും ഗതാഗത നിയമലംഘനങ്ങൾ നിയന്ത്രിക്കുന്നതിനുമായി ആഭ്യന്തര മന്ത്രാലയം നടത്തുന്ന തുടർച്ചയായ പരിശോധനകളുടെ ഭാഗമായാണ് നടപടി.
