കുവൈറ്റ് സിറ്റി : ക്രിക്കറ്റ് ലോകത്തെ വമ്പന്മാരായ ഇംഗ്ലണ്ടിനെ മുട്ടുകുത്തിക്കുമെന്ന് തോന്നിപ്പിച്ച നിമിഷങ്ങൾ. അധ്യാപകരും പിസ്സ ഷെഫുമാരും അണിനിരന്ന ഇറ്റാലിയൻ പട കൊൽക്കത്തയിലെ ഈഡൻ ഗാർഡൻസിനെ ആവേശക്കടലാക്കി മാറ്റി. പരാജയപ്പെട്ടെങ്കിലും ചാമ്പ്യൻമാരെ വെള്ളം കുടിപ്പിച്ചാണ് ഇറ്റലി മടങ്ങുന്നത്. 24 റൺസിന്റെ വിജയവുമായി ഇംഗ്ലണ്ട് സൂപ്പർ എട്ട് ഉറപ്പിച്ചെങ്കിലും ലോകചാമ്പ്യന്മാരുടെ ആത്മവിശ്വാസം തകർക്കാൻ ഇറ്റലിക്ക് സാധിച്ചു. സൂപ്പർ എട്ട് ഉറപ്പിക്കാൻ വിജയം അനിവാര്യമായിരുന്ന ഇംഗ്ലണ്ട് ഒരു ഘട്ടത്തിൽ 128/5 എന്ന നിലയിൽ പതറുകയായിരുന്നു. എന്നാൽ ഏഴാം നമ്പറിലിറങ്ങിയ വിൽ ജാക്സ് കളി മാറ്റിമറിച്ചു. വിൽ ജാക്സ് വെറും 22 പന്തിൽ പുറത്താകാതെ 53 റൺസ്, ഇംഗ്ലണ്ടിനായി ടി20 ലോകകപ്പിലെ ഏറ്റവും വേഗതയേറിയ ഫിഫ്റ്റി കുറിച്ച് താരം ടീമിനെ സുരക്ഷിത സ്ഥാനത്തെത്തിച്ചു. ജാക്സിന്റെയും സാം കറന്റെയും പ്രകടന മികവിൽ ഇംഗ്ലണ്ട് നിശ്ചിത 20 ഓവറിൽ 202/7 എന്ന വമ്പൻ ടോട്ടൽ
പടുത്തുയർത്തി. ക്യാപ്റ്റൻ ജോസ് ബട്ലർ വീണ്ടും പരാജയപ്പെട്ടത് ഇംഗ്ലണ്ടിന് വലിയ തിരിച്ചടിയായി.
203 റൺസ് എന്ന പടുകൂറ്റൻ ലക്ഷ്യം പിന്തുടർന്ന ഇറ്റലിക്ക് തുടക്കത്തിലേ രണ്ട് വിക്കറ്റുകൾ നഷ്ടമായിരുന്നു. ജോഫ്ര ആർച്ചർ 90 മൈൽ വേഗതയിൽ തീപ്പൊരി പന്തുകളുമായി കളം നിറഞ്ഞപ്പോൾ ഇറ്റലി അനായാസം കീഴടങ്ങുമെന്ന് കരുതിയവർക്ക് തെറ്റി. പക്ഷേ, തോൽക്കാൻ തയ്യാറല്ലാത്ത ഒരു പറ്റം പോരാളികളെയാണ് പിന്നീട് ഈഡൻ ഗാർഡൻസ് കണ്ടത്. ബെൻ മാനെന്റി ഇംഗ്ലീഷ് ബൗളർമാരെ നിലംതൊടാതെ പറത്തിയ നിമിഷങ്ങൾ, മാനെന്റി വെറും 25 പന്തിൽ 60 റൺസ് (6 സിക്സ്, 4 ഫോർ) അടിച്ചുകൂട്ടി മത്സരം തിരിച്ചുപിടിച്ചു. ലോകോത്തര സ്പിന്നർമാരായ ആദിൽ റാഷിദിനെയും ലിയാം ഡോസനെയും സിക്സറുകളിലൂടെയാണ് മാനെന്റി നേരിട്ടത്. മാനെന്റിക്ക് ശേഷം വെടിക്കെട്ട് ഏറ്റെടുത്ത സ്റ്റീവാർട്ട് (45 റൺസ്), ഇംഗ്ലീഷ് ബൗളിംഗ് നിരയെ നിഷ്പ്രഭമാക്കി. അവസാന 12 പന്തിൽ ഇറ്റലിക്ക് വേണ്ടിയിരുന്നത് വെറും 30 റൺസ് മാത്രമായിരുന്നു! അവിശ്വസനീയമായ ഒരു അട്ടിമറിക്ക് തൊട്ടടുത്തെത്തിയ ഇറ്റലിയെ കണ്ട് ഇംഗ്ലീഷ് ആരാധകർ പോലും സ്തബ്ധരായി നിന്നുപോയ നിമിഷങ്ങൾ.
ഒടുവിൽ പതറിപ്പോയ ഇംഗ്ലണ്ടിനെ രക്ഷിച്ചത് സാം കറന്റെ അനുഭവസമ്പത്താണ്. അവസാന ഓവറുകളിൽ കൃത്യതയോടെ പന്തെറിഞ്ഞ കറൻ 22 റൺസിന് 3 വിക്കറ്റ് വീഴ്ത്തി ഇറ്റലിയുടെ പോരാട്ടം 178 റൺസിൽ അവസാനിപ്പിച്ചു. ജെയ്മി ഓവർട്ടൺ അവസാന വിക്കറ്റും വീഴ്ത്തിയതോടെ ഇംഗ്ലണ്ട് ആശ്വാസജയം കുറിച്ചു. ഗ്രൂപ്പ് സിയിൽ വെസ്റ്റ് ഇൻഡീസിന് പിന്നിൽ രണ്ടാം സ്ഥാനക്കാരായാണ് ഇംഗ്ലണ്ട് സൂപ്പർ എട്ടിലേക്ക് യോഗ്യത നേടിയത്. എങ്കിലും കൊച്ചു ടീമുകൾക്കെതിരെ പോലും വിയർക്കുന്ന ഇംഗ്ലണ്ടിന്റെ പ്രകടനം ആരാധകരെ ആശങ്കയിലാക്കുന്നുണ്ട്. നിരവധി ചോദ്യചിഹ്നങ്ങളുമായിട്ടാണ് ലോകചാമ്പ്യന്മാർ അടുത്ത ഘട്ടത്തിനായി ശ്രീലങ്കയിലേക്ക് വണ്ടി കയറുന്നത്.
