കുവൈത്ത് സിറ്റി : അഴിമതിയുമായി ബന്ധപ്പെട്ട കേസുകളിൽ പ്രതികളായ മൂന്ന് പേർ രക്ഷപ്പെട്ട സംഭവത്തിൽ അടിയന്തര അന്വേഷണ സമിതി രൂപീകരിക്കാൻ പ്രഥമ ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് അൽ-സബാഹ് ഉത്തരവിട്ടു.
നിയമവാഴ്ച ഉറപ്പാക്കുന്നതിനും സുരക്ഷാ-ഭരണ സ്ഥാപനങ്ങളിലെ ഉത്തരവാദിത്തം ശക്തിപ്പെടുത്തുന്നതിനുമുള്ള ആഭ്യന്തര മന്ത്രാലയത്തിന്റെ പ്രതിബദ്ധതയുടെ ഭാഗമായാണ് ഈ നടപടി. രക്ഷപ്പെടൽ എങ്ങനെ സംഭവിച്ചു, ഇതിന് കാരണമായ വീഴ്ചകളോ അലംഭാവമോ ഉണ്ടായിരുന്നോയെന്ന് പരിശോധിച്ച് സമഗ്ര അന്വേഷണം നടത്താനും കണ്ടെത്തലുകൾ എത്രയും വേഗം സമർപ്പിക്കാനുമാണ് അന്വേഷണ സമിതിക്ക് നിർദേശം നൽകിയിരിക്കുന്നത്.അലംഭാവം, അധികാര ദുർവിനിയോഗം, അല്ലെങ്കിൽ അനധികൃത സഹായം എന്നിവയിലൂടെ രക്ഷപ്പെടലിന് കാരണമായതായി കണ്ടെത്തുന്നവർക്കെതിരെ ആവശ്യമായ എല്ലാ നിയമനടപടികളും സ്വീകരിക്കുമെന്ന് ആഭ്യന്തര മന്ത്രാലയം വ്യക്തമാക്കി.
അഴിമതിക്കെതിരായ മന്ത്രാലയത്തിന്റെ കർശന നിലപാടിനെയും നിയമത്തിൽ നിന്ന് ഒഴിഞ്ഞുമാറാൻ ശ്രമിക്കുന്നവരെയും ഒളിവിൽ കഴിയുന്ന പ്രതികളെയും കണ്ടെത്താനുള്ള ദൃഢനിശ്ചയത്തെയും ഈ തീരുമാനം പ്രതിഫലിപ്പിക്കുന്നതായി അധികൃതർ അറിയിച്ചു. നിയമത്തിന് മുകളിലായി ആരും ഇല്ലെന്നും എല്ലാ തലങ്ങളിലും ഉത്തരവാദിത്തം ഉറപ്പാക്കുമെന്നും അധികൃതർ വീണ്ടും വ്യക്തമാക്കി.
