കുവൈത്ത് സിറ്റി : വാണിജ്യ-വ്യവസായ മന്ത്രാലയത്തിന്റെ അടിയന്തര പരിശോധനാ സംഘവും ആഭ്യന്തര മന്ത്രാലയത്തിന്റെ അൽ-അഹ്മദി ഗവർണറേറ്റിലെ ക്രിമിനൽ ഇൻവെസ്റ്റിഗേഷൻ വിഭാഗവും സംയുക്തമായി നടത്തിയ വ്യാപക പരിശോധനയിൽ എട്ട് വ്യാപാര സ്ഥാപനങ്ങൾ അടപ്പിക്കുകയും 46 നിയമലംഘനങ്ങൾ രേഖപ്പെടുത്തുകയും ചെയ്തു.
പരിശോധനയ്ക്കിടെ വ്യാപാര ലൈസൻസുമായി ബന്ധപ്പെട്ട രണ്ട് നോട്ടീസുകൾ നൽകിയതായി വാണിജ്യ-വ്യവസായ മന്ത്രാലയം അറിയിച്ചു. നിയമലംഘനം നടത്തിയവർക്കെതിരെ രണ്ട് മന്ത്രാലയങ്ങളുടെയും ബന്ധപ്പെട്ട വകുപ്പുകളുടെ സഹകരണത്തോടെ ആവശ്യമായ നിയമനടപടികൾ സ്വീകരിച്ചതായും അധികൃതർ വ്യക്തമാക്കി. രാജ്യത്തെ നിലവിലുള്ള നിയമങ്ങളും ചട്ടങ്ങളും അനുസരിച്ച് അടച്ചുപൂട്ടൽ ആവശ്യമായ ഗുരുതര നിയമലംഘനങ്ങൾ കണ്ടെത്തിയതിനെ തുടർന്നാണ് എട്ട് കടകളും ഉടൻ അടയ്ക്കാൻ ഉത്തരവിട്ടതെന്ന് മന്ത്രാലയം അറിയിച്ചു.
വാണിജ്യ നിയമലംഘനങ്ങൾ തടയുന്നതിനും ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനുമായി രാജ്യത്തുടനീളം പരിശോധനകളും നിരീക്ഷണങ്ങളും തുടരുമെന്ന് മന്ത്രാലയം വ്യക്തമാക്കി.
വ്യാപാര സ്ഥാപനങ്ങളുടെ ഉടമകൾ എല്ലാ നിയമങ്ങളും ലൈസൻസിംഗ് വ്യവസ്ഥകളും കൃത്യമായി പാലിക്കണമെന്നും അല്ലാത്തപക്ഷം നിയമനടപടികൾ നേരിടേണ്ടിവരുമെന്നും മന്ത്രാലയം മുന്നറിയിപ്പ് നൽകി.
