കുവൈറ്റ് സിറ്റി : കേരള ഇസ്ലാമിക നവോത്ഥാനത്തിന് വിലമതിക്കാനാവാത്ത സംഭാവന നൽകിയ വ്യക്തിയാണ് വക്കം അബ്ദുൾ ഖാദർ മൗലവിയെന്ന് ഇന്ത്യൻ ഇസ്ലാഹി സെൻറർ സംഘടിപ്പിച്ച നവോത്ഥാന സമ്മേളനം. വക്കം മൗലവി സമ്പൂർണ്ണ കൃതികളുടെ മിഡിൽ ഈസ്റ്റ് തല പുസ്തക പ്രകാശനത്തോടനുബന്ധിച്ചാണ് നവോത്ഥാന സമ്മേളനം സംഘടിപ്പിച്ചത്. മുസ്ലിം വിഭാഗത്തിലെ പിന്നാക്കാവസ്ഥയ്ക്ക് പരിഹാരം കാണാൻ മൗലവി മുന്നോട്ടുവെച്ച ആശയം വിദ്യാഭ്യാസം നേടുക എന്നതായിരുന്നു. സാമൂഹികമായ പിന്നാക്കാവസ്ഥ പരിഹരിക്കാനുള്ള മാർഗം വിദ്യാഭ്യാസമാണ്. അദ്ദേഹം മുസ്ലിം സമൂഹത്തിലെ അനാചാരങ്ങൾക്കെതിരെ ശക്തമായ നിലപാട് സ്വീകരിക്കുകയും ചെയ്തിരുന്നു – ഐ.ഐ.സി സമ്മേളനം. മലയാള ഭാവുകത്വത്തെ നവീകരിക്കുന്നതിൽ ദിഷണാപരമായ നേതൃത്വം നൽകിയ പണ്ഡിതനും എഴുത്തുകാരനും വിമർശകനും പത്രപ്രവർത്തകനുമാണ് വക്കം മൗലവി. ജനങ്ങളോട് സംവദിക്കുക വഴിയാണ് സാമൂഹികമാറ്റം സാധ്യമാകുക എന്ന തിരിച്ചറിവായിരുന്നു വക്കം അബ്ദുൾ ഖാദർ മൗലവിയെ നയിച്ചത്. അത് 1905-ൽ അഞ്ചുതെങ്ങിൽ നിന്നും സ്വദേശാഭിമാനി പത്രം ആരംഭിക്കാൻ അദ്ദേഹത്തെ പ്രേരിപ്പിച്ചു. സമ്മേളനത്തിൽ മുഖ്യ പ്രഭാഷണം നടത്തിയ ഐ.എസ്.എം സംസ്ഥാന ഉപാധ്യക്ഷനും യുവപണ്ഡിതനുമായ റിഹാസ് പുലാമന്തോൾ വിശദീകരിച്ചു.
സംഗമം അൽ ജംഇയ്യത്തുൽ സൽസബീൽ ഖൈരിയ്യ ജനറൽ സെക്രട്ടറി ശൈഖ് അഹ്മദ് മുഹമ്മദ് സഈദ് അൽ ഫാരിസ് ഉദ്ഘാടനം ചെയ്തു. വക്കം മൗലവി സമ്പൂർണ്ണ കൃതികളുടെ മിഡിൽ ഈസ്റ്റ് തല പുസ്തക പ്രകാശനം മെഡ്രോ ഹോസ്പിറ്റൽ എം.ഡി ഹംസ പയ്യനൂരിന് നൽകി ശൈഖ് അഹ്മദ് മുഹമ്മദ് സഈദ് അൽ ഫാരിസ് നിർവ്വഹിച്ചു. വക്കം മൗലവി -സമ്പൂർണ്ണ കൃതിയെ അഷ്റഫ് മേപ്പയൂർ സദസ്സിന് പരിചയപ്പെടുത്തി സംസാരിച്ചു.
ഐ.ഐ.സി പ്രസിഡൻറ് യൂനുസ് സലീം അധ്യക്ഷത വഹിച്ചു. ഔക്കാഫ് പ്രതിനിധി മുഹമ്മദ് അലി, കെ.എം.സി.സി ജനറൽ സെക്രട്ടറി മുസ്തഫ കാരി, ലുലു പ്രതിനിധി ഷഫാസ് അഹ്മദ്, ഷബീൽ മുണ്ടോളി, മുബാറക് കാപ്രത്ത്, അബ്ദുറഹിമാൻ അൻസാരി, ഐ.ഐ.സി ജനറൽ സെക്രട്ടറി മനാഫ് മാത്തോട്ടം, അബ്ദുൽ അസീസ് സലഫി, അബ്ദുന്നാസർ മുട്ടിൽ, നബീൽ ഫാറോഖ് എന്നിവർ സംസാരിച്ചു. അൽ അമീൻ സുല്ലമി ഖിറാഅത്ത് നടത്തി.
