കുവൈത്ത് സിറ്റി : കുവൈത്ത് ഇന്ത്യൻ കമ്മ്യൂണിറ്റി സ്കൂൾ (ICSK) ഖൈത്താനിൽ രണ്ടാം പതിപ്പ് ICMUN 2026 വിജയകരമായി സംഘടിപ്പിച്ചു. ഓഗസ്റ്റ് 28, 29 തീയതികളിലായി നടന്ന സമ്മേളനത്തിൽ 75ഓളം പ്രതിനിധികളും 10 അംഗ എക്സിക്യൂട്ടീവ് കമ്മിറ്റിയും പങ്കെടുത്തു. ചർച്ച, ഗവേഷണം, ചർച്ചകളിലൂടെ ധാരണയിലെത്തൽ, സഹകരണം തുടങ്ങിയ മേഖലകളിൽ വിദ്യാർഥികൾ സജീവമായി ഇടപെട്ടു. ഓഗസ്റ്റ് 28ന് രാവിലെ സ്കൂൾ പ്രിൻസിപ്പൽ കെ. ഗംഗാധർ ഷിർസത്ത് സമ്മേളനം ഉദ്ഘാടനം ചെയ്തു. തുടർന്ന് സെക്രട്ടറി ജനറൽ മാസ്റ്റർ ഡേവിഡ് മാത്യു ഗാവൽ മുഴക്കി ICMUN 2026 ഔദ്യോഗികമായി ആരംഭിച്ചതായി പ്രഖ്യാപിച്ചു.
അഡ് ഹോക്, ഡിസാർമമെന്റ് ആൻഡ് ഇന്റർനാഷണൽ സെക്യൂരിറ്റി കമ്മിറ്റി (DISEC), യുണൈറ്റഡ് നേഷൻസ് ഓഫീസ് ഓൺ ഡ്രഗ്സ് ആൻഡ് ക്രൈം (UNODC), യുണൈറ്റഡ് നേഷൻസ് സെക്യൂരിറ്റി കൗൺസിൽ (UNSC) എന്നീ നാല് കമ്മിറ്റികളാണ് ഇത്തവണ ഉണ്ടായിരുന്നത്. ആഗോളതലത്തിലെ വിവിധ വിഷയങ്ങളിൽ പ്രതിനിധികൾ ചർച്ചകളും വാദപ്രതിവാദങ്ങളും നടത്തി. പ്രശ്നങ്ങൾക്ക് പരിഹാരം കണ്ടെത്തുന്നതിനായി ആശയങ്ങൾ അവതരിപ്പിക്കുകയും ചർച്ചകളിലൂടെ ധാരണയിലെത്തുകയും ചെയ്തു.
പൊതുപ്രസംഗം, വിമർശനാത്മക ചിന്ത, ഗവേഷണം, ചർച്ചകളിലൂടെ പരിഹാരം കണ്ടെത്തൽ, നേതൃത്വം, ആശയവിനിമയം തുടങ്ങിയ കഴിവുകൾ വികസിപ്പിക്കുന്നതിനുള്ള മികച്ച വേദിയായി ICMUN മാറി. പ്രതിനിധികളുടെ ആത്മവിശ്വാസവും ആവേശവും എക്സിക്യൂട്ടീവ് കമ്മിറ്റിയുടെ മികച്ച ഏകോപനവും സമ്മേളനത്തിന്റെ വിജയത്തിന് നിർണായകമായി. സമാപനച്ചടങ്ങിൽ ISEK ഡയറക്ടർ ഡോ. ഷെർലി ഡെന്നിസ് മുഖ്യാതിഥിയായി. മികച്ച പങ്കാളിത്തം കാഴ്ചവെച്ച പ്രതിനിധികളെ അഭിനന്ദിച്ച ഡോ. ഷെർലി, വിദ്യാർഥികളെ ഇത്തരം വേദികളിലേക്ക് പ്രോത്സാഹിപ്പിക്കുന്ന സ്കൂളിന്റെ പ്രവർത്തനത്തെ പ്രശംസിച്ചു. പൊതുപ്രസംഗം, ആശയവിനിമയം തുടങ്ങിയ കഴിവുകൾ മെച്ചപ്പെടുത്തുന്നതിനും ആത്മവിശ്വാസമുള്ള പ്രഭാഷകരും നേതാക്കളുമായി വളരുന്നതിനും ഇത്തരം പരിപാടികൾ സഹായിക്കുമെന്ന് അവർ പറഞ്ഞു.
തുടർന്ന് മികച്ച പ്രകടനം കാഴ്ചവെച്ച പ്രതിനിധികൾക്കും വിവിധ കമ്മിറ്റികളിലെ മികച്ച പങ്കാളികൾക്കും പുരസ്കാരങ്ങളും സമ്മാനങ്ങളും വിതരണം ചെയ്തു. നയതന്ത്ര മികവ്, ഗവേഷണം, സജീവ പങ്കാളിത്തം, മികച്ച പ്രകടനം എന്നിവ പരിഗണിച്ചാണ് പുരസ്കാരങ്ങൾ നൽകിയത്. സെക്രട്ടറി ജനറൽ മാസ്റ്റർ ഡേവിഡ് മാത്യു നന്ദിപ്രസംഗം നടത്തി. വിശിഷ്ടാതിഥികൾ, അധ്യാപകർ, എക്സിക്യൂട്ടീവ് കമ്മിറ്റി അംഗങ്ങൾ, പ്രതിനിധികൾ തുടങ്ങി സമ്മേളനത്തിന്റെ വിജയത്തിനായി പ്രവർത്തിച്ച എല്ലാവർക്കും അദ്ദേഹം നന്ദി അറിയിച്ചു. തുടർന്ന് ICMUN 2026 ഔദ്യോഗികമായി സമാപിച്ചു. ICMUN 2026ന്റെ രണ്ടാം പതിപ്പിന്റെ വിജയകരമായ സമാപനം ICSK ഖൈത്താന്റെ മറ്റൊരു ശ്രദ്ധേയ നേട്ടമായി. ക്ലാസ് മുറികൾക്കപ്പുറമുള്ള അറിവും അനുഭവങ്ങളും വിദ്യാർഥികൾക്ക് പകരുന്ന രണ്ട് ദിവസത്തെ സമ്മേളനം യുവശബ്ദങ്ങളുടെയും ആഗോള കാഴ്ചപ്പാടുകളുടെയും നയതന്ത്രത്തിന്റെ ശക്തിയുടെയും ആഘോഷമായി മാറി.
