കുവൈറ്റ്: കുവൈറ്റിലേക്ക് ഇനി ഗാർഹികത്തൊഴിലാളികളെ അയക്കില്ലെന്ന് വ്യക്തമാക്കി ഫിലിപ്പൈന്‍സ്. ഫിലിപ്പൈന്‍സിൽ നിന്ന് ഗാർഹികത്തൊഴിലിനായെത്തുന്നവരുടെ നേർക്ക് അതിക്രമം വർധിച്ച സാഹചര്യത്തിലാണ് പുതിയ തീരുമാനമെന്നാണ് ഫിലിപ്പൈൻ ലേബർ സെക്രട്ടറി സിൽവസ്റ്റർ ബെല്ലോ പറഞ്ഞത്.
സ്പോൺസറുടെ വീട്ടിൽ നിന്നും അതിക്രമം നേരിടേണ്ടി വന്ന ഫിലിപ്പൈനിൽ നിന്നുള്ള ജീനെലിൻ പഡേണൽ വില്ലാവെൻഡെ എന്ന ഗാർഹികത്തൊഴിലാളി കുറച്ച് ദിവസം മുമ്പ് കുവൈറ്റിൽ മരിച്ചിരുന്നു. ഇതിന് പിന്നാലെ സംഭവത്തെ ശക്തമായി അപലപിച്ച് ഫിലിപൈൻ വിദേശകാര്യ മന്ത്രാലയം രംഗത്തെത്തിയിരുന്നു. ഇതിന് തുടർച്ചയായാണ് കുവൈറ്റിലേക്ക് പുതിയതായി ഗാർഹിക തൊഴിലാളികളെ അയക്കില്ലെന്ന് പ്രഖ്യാപനം വന്നിരിക്കുന്നത്.
ജീനെലിന്റെ മരണത്തിന്റെ അന്വേഷണ പുരോഗതി കാത്തിരിക്കുകയാണെന്നും തൃപ്തികരമല്ലെങ്കിൽ കുവൈത്തിലെ മുഴുവൻ ഫിലിപ്പൈൻ തൊഴിലാളികളെയും തിരികെ വിളിക്കുമെന്നും അധികൃതർ വ്യക്തമാക്കിയിട്ടുണ്ട്. നിലവിൽ ഗാർഹികത്തൊഴിലാളികൾക്ക് മാത്രമാണ് വിലക്കെന്നും കൊല്ലപ്പെട്ട തൊഴിലാളിക്ക്‌ നീതി ലഭ്യക്കുന്നതിൽ സർക്കാർ വീഴ്ച വരുത്തിയാൽ സമ്പൂർണ നിരോധനം ഏർപ്പെടുത്തുമെന്ന് കുവൈത്ത് അധികൃതർക്ക്‌ സന്ദേശം അയച്ചതായും ഫിലിപ്പൈൻ ലേബർ സെക്രട്ടറി അറിയിച്ചിട്ടുണ്ട്.
