കുവൈത്ത് സിറ്റി: കാരുണ്യത്തിൻ്റെയും സാമൂഹ്യ ഐക്യദാർഢ്യത്തിൻ്റെയും ഭാഗമായി, ബ്ലഡ് ഡോണേഴ്സ് കേരള (ബിഡികെ) കുവൈറ്റ് ചാപ്റ്ററുമായി സഹകരിച്ച് എൻബിടിസി ഗ്രൂപ്പ് മെയ് 29ന് രക്തദാന ക്യാമ്പ് സംഘടിപ്പിച്ചു. കുവൈറ്റ് അദാൻ ബ്ലഡ് ട്രാൻസ്ഫ്യൂഷൻ സെൻ്റെറിൽ വെച്ച് നടന്ന രക്തദാന ക്യാംപിൽ എൻബിടിസിയിലെ നൂറിലധികം ജീവനക്കാർ രക്തദാനം നൽകി.
രക്തദാന ക്യാമ്പ് എൻബിടിസി ഗ്രൂപ്പ് കോർപ്പറേറ്റ് ഡയറക്ടർ (എച്ച്ആർ & അഡ്മിൻ) മനോജ് നന്തിയാലത്ത് ഉദ്ഘാടനം ചെയ്തു. യാതൊരു പ്രതിഫലേച്ഛയും കൂടാതെ മഹത്തായ ലക്ഷ്യത്തിനായി രക്തദാനം ചെയ്യാൻ മുന്നോട്ട് വന്ന എൻബിടിസി കുടുംബത്തിലെ അംഗങ്ങളെ അദ്ദേഹം അഭിനന്ദിച്ചു. ഇത്തരം മാതൃകാപരമായ പ്രവർത്തനങ്ങളാണ് എൻബിടിസിയുടെ കോർപ്പറേറ്റ് സാമൂഹ്യ ഉത്തരവാദിത്വത്തിനും ക്ഷേമത്തിനുമുള്ള പ്രതിബദ്ധത ഊട്ടിയുറപ്പിക്കുന്നതെന്നും അദ്ദേഹം അഭിപ്രായപ്പെട്ടു.
ബിഡികെ കുവൈറ്റ് ചാപ്റ്ററിൻ്റെ ജോയിൻറ്റ് കൺവീനറും എൻബിടിസി ജീവനക്കാരനുമായ നളിനാക്ഷൻ സ്വാഗതം പറഞ്ഞ ചടങ്ങിൽ എൻബിടിസി അഡ്മിനിസ്ട്രേഷൻ അസിസ്റ്റൻറ്റ് മാനേജർ റിനീഷ് ചന്ദ്രൻ ടി.വി., സീനിയർ നഴ്സ് അജീഷ് ബേബി എന്നിവർ രക്തദാനത്തിൻ്റെ രക്തദാനത്തിൻ്റെ പ്രാധാന്യവും മഹത്വവും വിശദീകരിച്ചു. ബിഡികെ പ്രതിനിധികളായ ജയൻ സദാശിവൻ, മനോജ് മാവേലിക്കര, രാജൻ തോട്ടത്തിൽ എന്നിവർ ഈ സംരംഭത്തിന് പിന്നിലെ അസാധാരണമായ സഹകരണ മനോഭാവത്തെയും പങ്കിട്ട ലക്ഷ്യത്തെയും പ്രശംസിച്ചു. എൻബിടിസി ഗ്രൂപ്പ് എച്ച്ആർ & അഡ്മിൻ സീനിയർ മാനേജർ റിജാസ് കെ.സി സമൂഹത്തിന് ഇത്തരം പ്രവർത്തനങ്ങളുടെ സുപ്രധാന പ്രാധാന്യത്തെക്കുറിച്ചും എൻബിടിസി ജീവനക്കാരുടെ ശ്രദ്ധേയമായ സന്നദ്ധതയെക്കുറിച്ചും സദസ്സിനെ അഭിസംബോധന ചെയ്തു.
എൻബിടിസി ജീവനക്കാരായ വെങ്കിടേശൻ എസ്. രാജൻ, വിധു എസ്. നായർ, ജിൻസ് എ. ജേക്കബ്, സനൽ കുമാർ, മുഹമ്മദ് അലി ചാത്തേരി, കലേഷ് മണ്ണേൻ്റെ, ക്രിസ്റ്റിൻ ടി. സാമുവൽ, സൗമ്യൻ എ., ഗോപാലകൃഷ്ണൻ ഹരീഷ്, ഗണേശൻ മുത്തുമാണിക്കം, ജീൻ ജോസഫ്, റിനു മത്തായി, ഹാനി എസ്, നെസീഫ് എം. അലി തുടങ്ങിയവർ നേതൃത്വം നൽകി.
രക്തദാനം ചെയ്ത ജീവനക്കാരെ എൻബിടിസി ഗ്രൂപ്പ് അഭിനന്ദിക്കുകയും ആദരസൂചകമായി ഹൈവേ സെൻ്റെർ സ്പോൺസർ ചെയ്ത ഡിസ്കൗണ്ട് കൂപ്പണുകളും എൻബിടിസി ഗ്രൂപ്പിൻ്റെ പ്രോത്സാഹന സമ്മാനങ്ങളും നൽകി. പരിചരണത്തിൻ്റെയും ഉത്തരവാദിത്തത്തിൻ്റെയും സംസ്കാരം വളർത്തിയെടുക്കുന്നതിൽ എൻബിടിസി ഗ്രൂപ്പ് പ്രതിജ്ഞാബദ്ധമാണ്, അതിൻ്റെ കോർപ്പറേറ്റ് മൂല്യങ്ങളുടെ യഥാർത്ഥ അളവ് സമൂഹത്തെ സേവിക്കുന്ന പ്രവർത്തനങ്ങളിലാണ് എന്നും മനസ്സിലാക്കുന്നു. ഇത്തരം പദ്ധതികളും പ്രവർത്തനങ്ങളും പങ്കാളിത്തവും “വൺ ടീം, വൺ ഫാമിലി” എന്ന എൻബിടിസി ഗ്രൂപ്പിൻ്റെ ആപ്തവാക്യം ഊട്ടിയുറപ്പിക്കുന്നതാണ്.
