കുവൈറ്റ് സിറ്റി : കുവൈത്തിൽ ശക്തമായ വടക്കുപടിഞ്ഞാറൻ കാറ്റിനെ തുടർന്ന് പൊടിക്കാറ്റും അതിശക്തമായ ചൂടും തുടരുന്നതായി കാലാവസ്ഥാ വകുപ്പ് അറിയിച്ചു. തുറന്ന പ്രദേശങ്ങളിലും മരുഭൂമി മേഖലകളിലും പൊടിക്കാറ്റ് മൂലം ദൃശ്യപരത ഗണ്യമായി കുറഞ്ഞിട്ടുണ്ട്.
കാലാവസ്ഥാ വകുപ്പിന്റെ ആക്ടിംഗ് ഡയറക്ടർ ധരാർ അൽ-അലിയുടെ വിശദീകരണപ്രകാരം, ഉപരിതല ന്യൂനമർദ്ദവും അത്യുഷ്ണ വായുപ്രവാഹവും ചേർന്നാണ് നിലവിലെ കാലാവസ്ഥയ്ക്ക് കാരണമായിരിക്കുന്നത്.
മണിക്കൂറിൽ 15 മുതൽ 55 കിലോമീറ്റർ വരെ വേഗതയിൽ വീശുന്ന വടക്കുപടിഞ്ഞാറൻ കാറ്റ് പല ഭാഗങ്ങളിലും പൊടിക്കാറ്റിന് ഇടയാക്കുന്നുണ്ട്. പൊടിക്കാറ്റ് കാരണം നിരവധി സ്ഥലങ്ങളിൽ, പ്രത്യേകിച്ച് തുറസ്സായ മേഖലകളിൽ, ദൃശ്യപരത കുറഞ്ഞിട്ടുണ്ട്. കടലിൽ തിരമാലകൾ ആറ് അടി വരെ ഉയരാനും സാധ്യതയുണ്ടെന്ന് മുന്നറിയിപ്പിൽ പറയുന്നു.
ദിവസത്തിന്റെ അവസാന ഭാഗത്തോടെ കാറ്റിന്റെ ശക്തി കുറയുന്നതിനാൽ പൊടിക്കാറ്റിന് ശമനമുണ്ടാകുകയും ദൃശ്യപരത മെച്ചപ്പെടുകയും ചെയ്യുമെന്ന് കാലാവസ്ഥാ വകുപ്പ് അറിയിച്ചു. എന്നാൽ പകൽ താപനില 47°C മുതൽ 48°C വരെയും , രാത്രിയിൽ 33°C മുതൽ 35°C വരെയും തുടരുമെന്നാണ് പ്രവചനം.
പൊടിക്കാറ്റ് ബാധിക്കുന്ന മേഖലകളിലൂടെ യാത്ര ചെയ്യുന്ന വാഹനയാത്രക്കാർ അതീവ ജാഗ്രത പാലിക്കണമെന്നും, കടലിൽ പോകുന്നവർ ഉയർന്ന തിരമാലകൾ കാരണം പ്രത്യേകം ശ്രദ്ധിക്കണമെന്നും കാലാവസ്ഥാ വകുപ്പ് നിർദേശിച്ചു.
